Kebra Nagast 18
aligned by seat — same row, same verse, whatever each bible numbers it
| v | Geez |
|---|---|
| 1 | ፲ወ፰ ፡ ኀበ ፡ ኀብሩ ፡ አበው ፡ ጳጳሳት ። ካዕበ ፡ አውሥኡ ፡ ማኅበረ ፡ ፫፻፲ወ፰ ፡ ወ ፡ ይቤሉ ፡ አሜን ፤ ዛቲኬ ፡ ይእቲ ፡ መድኀኒቶሙ ፡ ለደቂቀ ፡ አዳም ፡ እስመ ፡ ታቦተ ፡ ሕጉ ፡ ለእግዚኣብሔር ፡ እምከመ ፡ ወረደት ፡ ተሰምዩ ፡ ሰብአ ፡ ቤቱ ፡ ለእግዚኣብሔር ፤ በከመ ፡ ይቤ ፡ ዳዊት ፡ ወማኅደሮሂ ፡ ውስተ ፡ ጽዮን ፤ ወካዕበ ፡ ይቤ ፡ በአፈ ፡ መንፈስ ፡ ቅዱስ ፡ ወማኅደርየ ፡ ዝየ ፡ እስመ ፡ ኀረይክዋ ፡ ወእባርኮሙ ፡ ለካህናቲሃ ፡ ወኣስተፈሥሖሙ ፡ ለነዳያኒሃ ፤ ወለዳዊትኒ ፡ እሁቦ ፡ ዘርአ ፡ በውስቴታ ፡ በዲበ ፡ ምድርኒ ፡ ዘይከውን ፡ ንጉሠ ፡ ወበሰማያትኒ ፡ ይነግሥ ፡ እምዘርኡ ፡ በሥጋ ፡ ዲበ ፡ መንበረ ፡ መለኮት ፤ ወጸላእቱኒ ፡ ይገብኡ ፡ ታሕተ ፡ መከይደ ፡ እገሪሁ ፡ ወይትኀተሙ ፡ በማኅተመ ፡ ዚአሁ ፨ ፨ ፨ ፨ |