Jubilees 19

aligned by seat — same row, same verse, whatever each bible numbers it

← 18 20 →
vGeez
1 ወበዓመት ፡ አሐዱ ፡ ዘሱባዔ ፡ ቀዳሚ ፡ በዘ ፡ አርብዓ ፡ ወክልኤቱ ፡ ኢዮቤልዉ ፡ ተመይጠ ፡ አብርሃም ፡ ወኀደረ ፡ አንጸረ ፡ ኬብሮን ፡ ዛቲ ፡ ይእቲ ፡ ቀሪያታርባቅ ፡ ክልኤ ፡ ሱባዔ ፡ ዓመት ።
2 ወበዓመት ፡ ቀዳሚ ፡ ዘሱባዔ ፡ ሣልስ ፡ ዘዝ ፡ ኢዮቤልዉ ፡ ተፈጸመ ፡ መዋዕለ ፡ ሕይወተ ፡ ሳራ ፡ ወሞተት ፡ በኬብሮን ።
3 ወሖረ ፡ አብርሃም ፡ ከመ ፡ ይብኪያ ፡ ወይቅብራ ።
4 እስመ ፡ በትዕግሥተ ፡ መንፈስ ፡ ተናገረ ፡ ምስለ ፡ ውሉደ ፡ ኬጥ ፡ ከመ ፡ የሀብዎ ፡ መካነ ፡ ከመ ፡ ይቅበር ፡ በድኖ ፡ ውስቴቱ ።
5 ወእግዚአብሔር ፡ ወሀቦ ፡ ሞገሰ ፡ ሎቱ ፡ በቅድመ ፡ ኵሎሙ ፡ እለ ፡ ይሬእይዎ ።
6 ወእሙንቱሂ ፡ ያስተበቍዕዎ ፡ እንዘ ፡ ይብሉ ፡ ነሀብከ ፡ በከ ፡ ወኢነሥአ ፡ እምእዴሆሙ ፡ በከ ፡ እስመ ፡ ወሀበ ፡ ሤጦ ፡ ለመካን ፡ ብሩረ ፡ ፍጹመ ።
7 ወኮነ ፡ ኵሉ ፡ መዋዕለ ፡ ሕይወታ ፡ ለሳራ ፡ ምእት ፡ ወዕሥራ ፡ ወሰብዐቱ ፡ እሉ ፡ ዝክልኤ ፡ ኢዮቤልዉ ፡ ወአርባዕቱ ፡ ሱባዔ ፡ ወዓመት ፡ አሐዱ ፡ ዝንቱ ፡ መዋዕለ ፡ ዓመታተ ፡ ሕይወታ ፡ ለሳራ ።
8 ወዝመከራ ፡ ዓሥር ፡ በዘ ፡ ተመከረ ፡ ቦቱ ፡ አብርሃም ፡ ወተረክበ ፡ ምእመነ ፡ ዕጉሠ ፡ መንፈስ ፡ 9 ወኢይቤ ፡ ቃለ ፡ በእንተ ፡ ንባብ ፡ ዘምድር ፡ ዘይቤ ፡ እግዚአብሔር ፡ የሀባ ፡ ኪያሃ ፡ ሎቱ ፡ ወለዘርኡ ፡ እምድኅሬሁ ።
10 ወበዓመት ፡ ራብዕ ፡ ሎቱ ፡ ነሥአ ፡ ለይስሐቅ ፡ ወልዱ ፡ ብእሲተ ፡ ወስማ ፡ ርብቃ ፡ ወለተ ፡ ባቱኤል ፡ ወልደ ፡ ናኮር ፡ እኅወ ፡ አብርሃም ፡ እኅተ ፡ ላባ ፡ ወባቱኤል ፡ ወለዶሙ ፡ ለባቱኤላዊያን ፡ ወልደ ፡ ሜልከ ፡ ዘብእሲተ ፡ ናኮር ፡ እኅወ ፡ አብርሃም ።
11 ወአብርሃም ፡ ነሥአ ፡ ሎቱ ፡ ሣልስተ ፡ ብእሲተ ፡ ወስማ ፡ ኬጡራ ፡ እምነ ፡ ውሉደ ፡ ልደ ፡ ቤቱ ፡ አመ ፡ ሞተት ፡ አጋር ፡ እምቅድመ ፡ ሳራ ፡ 12 ወወለደት ፡ ሎቱ ፡ ውሉደ ፡ ስድስተ ፡ ዘንበሪሃ ፡ ወያክስንሃ ፡ ወማዳይሃ ፡ ወማዳንሃ ፡ ወኢያዝቦቅሃ ፡ ወሴሂያሃ ፡ በክልኤ ፡ ሱባዔ ፡ ዓመት ።
13 ወበሱባዔ ፡ ሳድስ ፡ በካልእ ፡ ዓመቱ ፡ ወለደት ፡ ርብቃ ፡ ለይስሐቅ ፡ ክልኤ ፡ ደቂቀ ፡ ያዕቆብሃ ፡ ወዔሳውሃ ፡ ወያዕቆብሰ ፡ ፍጹም ፡ ወራትዕ ፡ ወዔሳው ፡ ውእቱ ፡ ብእሲ ፡ ድሩክ ፡ ወሐቃላዊ ፡ ወጸጓር ፡ ወያዕቆብ ፡ የኀድር ፡ ውስተ ፡ ምጽላላት ፡ 14 ወልህቁ ፡ ወራዙት ፡ ወተምህረ ፡ ያዕቆብ ፡ መጽሐፈ ፡ ወዔሳውሰ ፡ ኢተምህረ ፡ እስመ ፡ ብእሲ ፡ ሐቃላዊ ፡ ውእቱ ፡ ወነዓዊ ፡ ወተምህረ ፡ ፀብአ ፡ ወኵሉ ፡ ግብሩ ፡ ድሩክ ።
15 ወያፈቅር ፡ ያዕቆብሃ ፡ አብርሃም ፡ ወይስሐቅ ፡ ዔሳውሃ ።
16 ወርእየ ፡ አብርሃም ፡ ግብሮ ፡ ለዔሳው ፡ ወአእመረ ፡ ከመ ፡ በያዕቆብ ፡ ይጼዋዕ ፡ ሎቱ ፡ ስም ፡ ወዘርእ ።
17 ወይቤላ ፡ ወለትየ ፡ ዕቀቢ ፡ ወልድየ ፡ ያዕቆብሃ ፡ እስመ ፡ ውእቱ ፡ ይከውን ፡ ህየንቴየ ፡ ዲበ ፡ ምድር ፡ ወለበረከት ፡ በማእከለ ፡ ውሉደ ፡ ሰብእ ፡ ወለኵሉ ፡ ዘርአ ፡ ሴም ፡ ለትምክሕት ፡ 18 እስመ ፡ አአምር ፡ ከመ ፡ ኪያሁ ፡ የኀሪ ፡ እግዚአብሔር ፡ ሎቱ ፡ ለሕዝብ ፡ ቃውም ፡ እምኵሎሙ ፡ እለ ፡ ዲበ ፡ ገጸ ፡ ምድር ።
19 ወናሁ ፡ ይስሐቅ ፡ ወልድየ ፡ ያፈቅሮ ፡ ለዔሳው ፡ እምነ ፡ ያዕቆብ ፡ ወአነ ፡ እሬእየኪ ፡ መፍቀሪተ ፡ ጽድቅ ፡ ያዕቆብሃ ፡ 20 ወስኪ ፡ ዓዲ ፡ አሠንዮ ፡ ላዕሌሁ ፡ ወይኩና ፡ አዕይንቲኪ ፡ ላዕሌሁ ፡ ለፍቁር ።
21 ይጽንዓ ፡ እደዊኪ ፡ ወትትፈሣሕ ፡ ልብኪ ፡ በወልድኪ ፡ ያዕቆብ ።
22 እመ ፡ ይክል ፡ ሰብእ ፡ ኆልቆ ፡ ኆፃ ፡ ምድር ፡ ከማሁ ፡ ይትኌለቁ ፡ ዘርኡሂ ፡ 23 ወኵሎን ፡ በረከት ፡ እለ ፡ ባረከኒ ፡ እግዚአብሔር ፡ ኪያየ ፡ ወዘርእየ ፡ ለያዕቆብ ፡ ወለዘርኡ ፡ ይኩን ፡ ኵሎ ፡ መዋዕለ ፡ 24 ወበዘርኡ ፡ ይትባረክ ፡ ስምየ ፡ ወስመ ፡ አበዊየ ፡ ሴም ፡ ወኖኅ ፡ ወሄኖክ ፡ ወመላልኤል ፡ ወሄኖስ ፡ ወሴት ፡ ወአዳም ፡ 25 ወእሙንቱ ፡ ይኩኑ ፡ ለሣርሮ ፡ ሰማይ ፡ ወለአጽንዖ ፡ ምድር ፡ ወለሐድሶ ፡ ኵሉ ፡ ብርሃናት ፡ ዘዲበ ፡ ምጽናዓት ።
26 ወጸውዖ ፡ ለያዕቆብ ፡ በቅድመ ፡ አዕይንቲሃ ፡ ለርብቃ ፡ እሙ ፡ ወሰዐሞ ፡ ወባረኮ ፡ ወይቤ ፡ 27 ወልድየ ፡ ያዕቆብ ፡ ፍቁር ፡ ዘአፍቀረት ፡ ነፍስየ ፡ ይባርከ ፡ አምላክ ፡ እመልዕልተ ፡ ምጽናዓት ፡ ወየሀብከ ፡ ኵሎን ፡ በረከታተ ፡ እለ ፡ ባረኮ ፡ ለአዳም ፡ ወሄኖክሃ ፡ ወኖኅሃ ፡ ወሴምሃ ፡ ወኵሎ ፡ ዘመጠነ ፡ ተናገረኒ ።
28 ወኢይመብሉ ፡ ላዕሌከ ፡ ወላዕለ ፡ ዘርእከ ፡ መናፍስተ ፡ መስቴማ ፡ ከመ ፡ ያርኅቁከ ፡ እምድኅረ ፡ እግዚአብሔር ፡ ዘውእቱ ፡ አምላክከ ፡ እምይእዜ ፡ ወእስከ ፡ ለዓለም ።
29 ወይኩንከ ፡ እግዚአብሔር ፡ አምላክ ፡ አበ ፡ ወአንተሂ ፡ ወልደ ፡ በኵረ ፡ ወለሕዝብ ፡ ኵሎ ፡ መዋዕለ ።
30 ወወፅኡ ፡ ክልኤሆሙ ፡ ኅቡረ ፡ እምኀበ ፡ አብርሃም ፡ 31 ወአፍቀረቶ ፡ ርብቃ ፡ ለያዕቆብ ፡ በኵሉ ፡ ልባ ፡ ወበኵሉ ፡ መንፈሳ ፡ ብዙኀ ፡ ፈድፋደ ፡ እምነ ፡ ዔሳው ፡ ወይስሐቅ ፡ ያፈቅሮ ፡ ለዔሳው ፡ ፈድፋደ ፡ እምያዕቆብ ።