Joel 3

aligned by seat — same row, same verse, whatever each bible numbers it

← 2
vGeez
1 እስመ፡ ይእተ፡ አሚረ፡ አነ፡ በእማንቱ፡ መዋዕል፡ እመይጥ፡ ፄዋ፡ ይሁዳ፡ ወኢየሩሳሌም።
2 ወአስተጋብኦሙ፡ ለኲሉ፡ አሕዛብ፡ ዋኣዋርዶሙ፡ ቆላት፡ ዩሳፍጥ፡ ወእትዋቀሦሙ፡ በሕየ፡ በእንተ፡ ሕዝብየ፡ ወበእንተ፡ ርስትየ፡ እስራኤል፡ በኀበ፡ ተዘርዉ፡ ውስተ፡ ኣሕዛብ፡ ወተካፈሉ፡ ምድርየ።
3 ወተዐጸዉ፡ ዲበ፡ ሕዝብየ፡ ወወሀቡ፡ ደቂቆሙ፡ ለዘማት፡ ወሤጡ፡ አዋዲሆሙ፡ ለወይን፡ ወሰትዩ።
4 ምንተ፡ ብየ፡ ምስሌክን፡ ጢሮስ፡ ወዲዶና፡ ወኲሉ፡ ገሊላ፡ ዘኢሎፍሊ፡ በቀለኑ፡ ትትቤቀላኒ፡ ወቂመኑ፡ ትትቀየማኒ፡ ፍጡነ፡ ወጉጉአ፡ እፈድየክሙ፡ ርእስክመሙ።
5 ናሁ፡ ነሳእክሙ፡ ወርቅየ፡ ወብሩርየ፡ ወዓስራትየ፡ ወመሠንዩ፡ አባእክሙ፡ ቤተክሙ።
6 ወሤጥክምዎሙ፡ ለደቂቀ፡ ይሁዳ፡ ወለደቂቀ፡ እየሩሳሌም፡ ኀበ፡ ደቂቀ፡ አረሚ፡ ከመ፡ ታጥፍእዎሙ፡ እምብሔሮሙ።
7 ናሁ፡ አነ፡ አነስኦሙ፡ እምውእቱ፡ ብሔር፡ ኀበ፡ ሤትክምዎሙ፡ ህየ፡ ወእፈድየክሙ፡ ፍዳክሙ፡ ዲበ፡ ርእስክሙ።
8 ወእትቤቀሎሙ፡ ለደቂቅክሙ፡ ወለአዋልዲክሙ፡ በእዴሆሙ፡ ለደቂቀ፡ ይሁዳ፡ ወእትቤቀለክሙ፡ በኀበ፡ ተፄወውክሙ፡ በውስተ፡ አሕዛብ፡ ርኁቃን፡ ነዋኀ፡ እስመ፡ እግዚአብሔር፡ ነበበ።
9 ስብኩ፡ ዘንተ፡ ውስተ፡ አሕዛብ፡ ወዐስሩ፡ ጸብአ፡ ወአንስኡ፡ መስተቃትላነ፡ አውፅእዎሙ፡ ወይዕርጉ፡ ኲሉ፡ ዕደው፡ መስተቃትላን።
10 ወማሕረሰክሙኒ፡ አግብሩ፡ ኮያንወ፡ ወማዕፅደክመሂ፡ አግብሩ፡ ረምሐ፡ ድኩምኒ፡ ይበል፡ ጽኑዕ፡ አነ።
11 ወይትጋብኡ፡ ኲሉ፡ አሕዛብ፡ ወይሖሩ፡ ይዕግቱ፡ መስተባእሳነ።
12 ወይትነስኡ፡ ኩሉ፡ አሕዛብ፡ ወይዕርጉ፡ ቆላተ፡ ዩሳፍጥ፡ ለእስመ፡ ሕየ፡ እነብር፡ ወአስተዋቅሶሙ፡ ለኩሉ፡ አሕዛብ፡ ወእ፡ አድያም።
13 ፈንዉ፡ ማዕፅደ፡ እስመ፡ በጽሐ፡ ማእረር፡ ባኡ፡ ኪዱ፡ እስመ፡ መልአ፡ ምክያድ፡ ወተክዕወ፡ እምነ፡ ምክያዳት፡ ናሁ፡ በዝኀ፡ እከዩሙ።
14 ወውዑ፡ በቆላተ፡ ቅስት፡ ወደምፁ፡ እስመ፡ አልጸቀት፡ ዕለተ፡ እግዚአብሔር፡ በውስተ፡ ቆላተ፡ ቅስት።
15 ፀሐይ፡ ወወርኀ፡ ይጸልሙ፡ ወለከዋብትኒ፡ የዐርብ፡ ብርሃኖሙ።
16 ወይኬልሕ፡ እግዚአብሔር፡ እምጽየን፡ ወእምኢየሩሳም፡ ይሁብ፡ ቃለ፡ ወያድለቀልቅ፡ ሰማይ፡ ወምድር፡ ወእግዚአብሔር፡ ይምሕክ፡ ሕዝቦ፡ ወያጸንዖሙ፡ እግዚአብሔር፡ ለደቂቀ፡ እስራኤል።
17 ወተአምሩ፡ እንከ፡ ከመ፡ አነ፡ እግዚአብሔር፡ አምላክሙ፡ ዘአኀድር፡ ውስተ፡ ጽየን፡ በደብረ፡ መቅደስየ፡ ወትከውን፡ ኢየሩሳሌም፡ ሀገረ፡ ቅድስት፡ ወኢየኀልፍ፡ እንከ፡ እንተ፡ ውስቴታ፡ ዝእምካልእ፡ ህዝብ።
18 ወይከውን፡ ይእተ፡ አሚረ፡ ያንጸፈጽፍ፡ መዐር፡ እምአድባር፡ ወይውኀዝ፡ ሐሊበ፡ እምአውግር፡ ዋይነቅዕ፡ ማይ፡ በኩሎ፡ በሐውር፡ ይሁዳ፡ ወይፈልፍል፡ ነቅዕ፡ ወይወፅእ፡ ፈለገ፡ ሰኪኖን።
19 ወይማስን፡ ብሔረ፡ ግብፅ፡ ወይከውን፡ በድወ፡ ኤዶምያስ፡ ወይጠፍኡ፡ በኃጢአቶሙ፡ ለደቂቀ፡ ይሁዳ፡ እስመ፡ ከዐዉ፡ ደመ፡ ጻድቅ፡ ውስተ፡ ምድሮሙ።
20 ወይዳሰ፡ ለዓለም፡ ትነብር፡ ወኢየሩሳምኒ፡ ለትውልደ፡ ትውልድ።
21 ወእትቤቀል፡ ደሞሙ፡ ወኢነጽህ፡ እስመ፡ እግዚአብሔር፡ የኀድር፡ ውስተ፡ ጽዩን።