Codex Sacra scripture, aligned

Isaiah 66

aligned by seat — same row, same verse, whatever each bible numbers it

← 65
vGeez
1 ከመዝ፡ ይቤ፡ እግዚአብሔር፡ ሰማይኒ፡ መንበርየ፡ ወምድርኒ፡ መከየደ፡ እገርየ።
2 ዝንቱሰ፡ ኵሉ፡ ግብረ፡ እደውየ፡ ወዝንቱሰ፡ ኵሉ፡ ዘዚአየ፡ ውእቱ፡ ይቤ፡ እግዚአብሔር።
3 ወኃጥእሰ፡ ዘይሠውዕ፡ ሊተ፡ ላህመ፡ ከመ፡ ዘይጠብሕ፡ ሊተ፡ ከልበ፤ ወዘሂ፡ ያበውእ፡ ሊተ፡ ስንዳሌ፡ ከመ፡ ዘደመ፡ ሐራውያ፣፡ ወዘሂ፡ ይሁብ፡ ስኂነ፡ ለተዝካርየ፡ ከመ፡ ዘፅሩፍ።
4 ወአነሂ፡ እፈቅድ፡ አኀሥሮሙ፡ ወእትበቀሎሙ፡ በእንተ፡ ኃጢአቶሙ።
5 ስምዑ፡ ቃለ፡ እግዚአብሔር፡ እለ፡ ትርዕዱ፡ እምቃሉ፤ በልዎሙ፡ አኃዊነ፡ ለጸላእትክሙ፡ ከመ፡ ይሰባሕ፡ ስመ፡ እግዚአብሔር፡ ወያስተርኢ፡ ትፍሥሕትክሙ፡ ወእሙንቱ፡ ይትኀፈሩ።
6 ቃለ፡ ጽራሕ፡ እምሀገር፣፡ ቃል፡ እምቤተ፡ መቅደስ፡ ወቃለ፡ እግዚአብሔር፡ ዘይትቤቀል፡ በቀለ፡ እምነ፡ ፀሩ።
7 ዘእንበለ፡ ትሕምም፡ ትለድ፡ እንተ፡ ውስተ፡ ማሕምም፡ ወወለደት፡ ተባዕተ።
8 መኑ፡ ሰምዐ፡ ዘከመዝ፡ ወመኑ፡ ርእየ፡ ዘከመዝ፡ ወወለደትኑ፡ ምድር፡ ለአሐቲ፡ ሰዓት፤ ይትወለዱኑ፡ አሕዛብ፡ በምዕር፡ እስመ፡ ወለደት፡ ጽዮን፡ ደቂቀ።
9 ወአነ፡ ወሀብኩኪ፡ ትፍሥሕተ፡ ወአንቲኒ፡ ኢተዘከርክኒ፡ ይቤ፡ እግዚአብሔር።
10 ተፈሥሒ፡ ኢየሩሳሌም፡ ወተኀሠዩ፡ ኵሎሙ፡ እለ፡ ያፈቅርዋ፤ ተፈሥሑ፡ ትፍሥሕተ፡ ኵልክሙ፡ እለ፡ ለሐውክምዋ።
11 ከመ፡ ትልሀቁ፡ ወትጽገቡ፡ እምአጥባተ፡ ትፍሥሕታ፡ ወከመ፡ ትትሐፀኑ፡ ወትትፈሥሑ፡ በክብራ።
12 ከመዝ፡ ይቤ፡ እግዚአብሔር፤ ናሁ፡ አነ፡ አመጽእ፡ ሰላመ፡ ሎሙ፡ ከመ፡ ውኂዝ፡ ወከመ፡ ማዕበለ፡ ባሕር፡ ክብረ፡ አሕዛብ።
13 በከመ፡ ታስፌሥሕ፡ እም፡ አነ፡ አስተፌሥሐክሙ፡ በኢየሩሳሌም።
14 ወትሬእዩ፡ ወይትፌሥሐክሙ፡ ልብክሙ፡ ወአዕፅምቲክሙ፡ ይሠርፃ፡ ከመ፡ ሣዕር።
15 ናሁ፡ ይመጽእ፡ እግዚአብሔር፡ ከመ፡ እሳት፡ ወከመ፡ ዐውሎ፡ ሠረገላሁ፡ ከመ፡ ይትበቀሎሙ፡ በመዐቱ፡ ወተግሣጹ፡ በነደ፡ እሳት።
16 እስመ፡ በእሳተ፡ እግዚአብሔር፡ ይትኴነኑ፡ ኵሉ፡ ምድር፡ ወበኲናቱ፡ ኵሉ፡ ዘነፍስ፤ እስመ፡ ብዙኃን፡ ቅቱላን፡ እምኀበ፡ እግዚአብሔር።
17 እለ፡ ይጸርዩ፡ ወይነጽሑ፡ በገነት፡ ወበምርፋቃት፡ እንዘ፡ ይበልዑ፡ ሥጋ፡ ሐራውያ፡ ወርኩሰ፡ ወአንጼዋ፣፡ ኅቡረ፡ ይማስኑ፡ ይቤ፡ እግዚአብሔር።
18 ወአነ፡ አአምር፡ ግብሮሙ፡ ወሕሊናሆሙ፡ ወናሁ፡ አነ፡ እመጽእ፡ ወአስተጋብእ፡ ኵሎ፡ አሕዛበ፡ ወይመጽኡ፡ ወይሬእዩ፡ ስብሐትየ።
19 ወእገብር፡ ሎሙ፡ ትእምርተ፡ ወእፌንዎሙ፡ ውስተ፡ አሕዛብ፡ እለ፡ ድኅኑ፡ እምውስተ፡ ሞት፣፡ ውስተ፡ ተርሴስ፡ ወፉድ፡ ወሉድ፡ ወሞሳሕ፡ ወቶቤል፡ ወኤላድ፡ ወውስተ፡ ደሰያት፡ ዘርኁቅ፡ እለ፡ ኢሰምዑ፡ ምግባርየ፡ ወኢርእዩ፡ ስብሐትየ።
20 ወያመጽእዎሙ፡ ለአኃዊሆሙ፡ እምኵሉ፡ በሐውርት፡ አምኃሁ፡ ለእግዚአብሔር፡ በአፍራስ፡ ወበሠረገላት፡ ወበለንጴኔ፡ ወበአግማል፡ ወበአብቅልት፡ ውስተ፡ ሀገር፡ ቅድስት፡ ይቤ፡ እግዚአብሔር፣፡ በከመ፡ አዕረጉ፡ ሊተ፡ ደቂቀ፡ እስራኤል፡ መሥዋዕቶሙ፡ በመዝሙር፡ ውስተ፡ ቤተ፡ እግዚአብሔር።
21 ወእነሥእ፡ እምውስቴቶሙ፡ ካህናተ፡ ወሌዋውያነ፡ ይቤ፡ እግዚአብሔር።
22 ወበከመ፡ ዘእገብር፡ አነ፡ ሰማየ፡ ሐዲሰ፡ ወምድረ፡ ሐዲሰ፡ ዘይነብር፡ ቅድሜየ፡ ይቤ፡ እግዚአብሔር፣፡ ከማሁ፡ ይቀውም፡ ዘርእክሙ፡ ወስምክሙ።
23 ወይከውን፡ ወርኃ፡ እምወርኅ፡ ወሰንበተ፡ እምሰንበት፤ ወይመጽእ፡ ኵሉ፡ ዘነፍስ፡ ቅድሜየ፡ ወይሰግድ፡ ሊተ፡ በኢየሩሳሌም፡ ይቤ፡ እግዚአብሔር።
24 ወይወፅኡ፡ ወይሬእዩ፡ አብድንቲሆሙ፡ ለእለ፡ ዐለዉኒ፤ ወዕፄሆሙኒ፡ ዘኢይነውም፡ ወእሳቶሙኒ፡ ዘኢይጠፍእ፤ ወይከውኑ፡ አርአያ፡ ለኵሉ፡ ዘሥጋ።