Isaiah 17

aligned by seat — same row, same verse, whatever each bible numbers it

← 16 18 →
vGeez
1 ናሁ፡ ትጠፍእ፡ ደማስቆ፡ እምነ፡ አህጉር፡ ወትወድቅ።
2 ወትትመዘበር፡ ለዓለም፡ ወተዐርፍ፡ እንከ፡ ውስተ፡ አብያተ፡ ኖሎት፡ ወአልቦ፡ ዘይረውድ።
3 ወአልባ፡ ጸወነ፡ ኀበ፡ ትጼወን፡ ኤፍሬም፤ ወኢይነግሥ፡ እንከ፡ ንጉሥ፡ በደማስቆ፡ ወእለሂ፡ ተርፉ፡ እምሶርያ፤ ዘአኮ፡ አንተ፡ ትኄይስ፡ እምደቂቀ፡ እስራኤል፡ ወእምክብሮሙ፤ ከመዝ፡ ይቤ፡ እግዚአብሔር፡ ጸባኦት።
4 ውእተ፡ አሚረ፡ የኀልቅ፡ ክብሩ፡ ለያዕቆብ፡ ወያድለቀልቅ፡ ዘይበዝኅ፡ ትርሲቱ።
5 ወይከውን፡ ከመ፡ ዘያስተጋብእ፡ ማእረረ፡ ዘበጽሐ፡ ወዘየዐፅድ፡ ዘርኣ፡ ወሰዊተ፤ ወይከውን፡ ከመ፡ ዘያስተጋብእ፡ ሰዊተ፡ ዘበሰለ፡ በውስተ፡ ቈላት።
6 ወይተርፍ፡ ቀሪማ፡ በውስቴታ፤ ወከመ፡ ሕንባባተ፡ ዘይት፡ ክልኤቱ፡ ወእመአኮ፡ ሠላስ፡ በውስተ፡ ርእሰ፡ ነዋኅ፡ ወበውስተ፡ አዕጹቂሃ፣፡ እመአኮ፡ አርባዕ፡ ወእመአኮ፡ ኃምስ፡ ይተርፉ፤ ከመዝ፡ ይቤ፡ እግዚአብሔር፡ አምላከ፡ እስራኤል።
7 ውእተ፡ ዕለተ፡ ይትዌከል፡ ሰብእ፡ በፈጣሪሁ፡ ወይኔጽራ፡ አዕይንቲሁ፡ ኀበ፡ ቅዱሰ፡ እስራኤል።
8 ወኢይትአመኑ፡ እንከ፡ በጣዖቶሙ፡ ወኢበግብረ፡ እደዊሆሙ፡ በዘገብራ፡ አፃብዒሆሙ፤ ወኢይገዝሙ፡ ዕፀ፡ ለርኵሶሙ።
9 ውእተ፡ አሚረ፡ ይከውና፡ መዝብረ፡ አህጉርኪ፡ ከመ፡ መዝብረ፡ አሞሬዎን፡ ወኤዌዎን፡ እምቅድመ፡ ገጾሙ፡ ለደቂቀ፡ እስራኤል፡ ወትከውን፡ ገዳመ።
10 እስመ፡ ኀደጎ፡ ለአምላክከ፡ ወመድኃኒከ፡ ወኢተዘከርኮ፡ ለእግዚአብሔር፡ ዘአስተዘከርኮ፡ ለእግዚአብሔር፡ ዘአስተርአየከ፤ በእንተ፡ ዝንቱ፡ ትተክል፡ ተክለ፡ ሐሰት፡ ወትዘርእ፡ ዘርአ፡ ኃሣር።
11 ወአመ፡ ትተክል፡ ትጌጊ፡ ወይፈሪ፡ ዘዘራእከ፡ በጽባሕ፡ በማእረር፡ አመ፡ ዕለተ፡ ታወርስ፤ ወከመ፡ አብ፡ ለወልዱ፣፡ አንተኒ፡ ታወርስ፡ ለደቂቅከ።
12 አሌ፡ ሎሙ፡ ለብዙኃን፡ አሕዛብ፡ እለ፡ መልኡ፡ ከመ፡ ማዕበለ፡ ባሕር፡ ከማሁ፡ ትትከወሱ፤ ወከወለ፡ ብዙኃን፡ ሕዝበ፡ ከመ፡ ማይ፡ ይደምፁ።
13 ወከመ፡ ማይ፡ ብዙኅ፡ ከማሁ፡ ብዙኅ፡ ሕዝብ፣፡ ወከመ፡ ውኂዘ፡ ዓቢይ፡ ማይ፡ ዘይወርድ፡ በኃይል፡ እምውስተ፡ መንበሐብሐት፤ ወያጠፍእዎ፡ ወእምርኁቅ፡ ይወርዱ፡ ከመ፡ ጸበለ፡ ሐሠር፡ ዘቅድመ፡ ዐውሎ፡ ዘየሐፍሶ፡ ወከመ፡ ጸበለ፡ ሠረገላ፡ ዘይነሥኦ፡ ነፋስ።
14 ፍና፡ ሰርክ፡ ይላሕዉ፡ ዘእንበለ፡ ይጽባሕ፡ ወኢትከውኖሙ።