Ecclesiastes 1

aligned by seat — same row, same verse, whatever each bible numbers it

2 →
vGeez
1 ቃለ፡ ሰሎሞን፡ መክብብ፡ ወልደ፡ ዳዊት፡ ንጉሠ፡ እስራኤል፡ በኢየሩሳሌም።
2 ከንቱ፡ ከንቱ፡ ይቤ፡ መክብብ፡ ኵሉ፡ ከንቱ።
3 ምንት፡ ፍድፋዴሁ፡ ለሰብእ፡ በኵሉ፡ ፃማሁ፡ ዘይፃሙ፡ እምታሕተ፡ ፀሐይ።
4 ትውልድ፡ የኃልፍ፡ ትውልድ፡ ይመጽእ፡ ወምድርሰ፡ ለዓለም፡ ትቀውም።
5 ይሠርቅ፡ ፀሐይ፡ ወየዐርብ፡ ፀሐይ፡ ወውስተ፡ መካኑ፡ ይገብእ፡ እንዘ፡ ይሠርቅ፡ ውእቱ፡ ህየ፡ ይገብእ፡ በይምን፡ ወየዐውድ፡ መንገለ፡ ሰሜን።
6 ዓውደ፡ የዓውድ፡ ወየሐውር፡ መንፈስ፡ ወበዑደቱ፡ ይገብእ፡ መንፈስ።
7 ወኵሎሙ፡ ውሒዛት፡ የሐውሩ፡ ውስተ፡ ባሕር፡ ወባሕርኒ፡ ኢኮነት፡ እንተ፡ ትመልእ፡ ውስተ፡ መካና።
8 ወእደ፡ የሐውሩ፡ አፍላግ፡ ህየ፡ ካዕበ፡ ይትመየጡ፡ ለሐዊር።
9 ኵሉ፡ ቃል፡ ዘበሕማም፡ ኢይክል፡ ብእሲ፡ ለተናግሮ፡ ወኢይጸግብ፡ ዓይን፡ በርእይ፡ ወኢይመልእ፡ ዕዝን፡ በአጽምኦ።
10 ወምንት፡ ውእቱ፡ ገብረ፡ እምዘተገብረ፡ ወምንት፡ ውእቱ፡ ዘኮነ፡ እምዘኮነ፡ ወአልቦ፡ ምንትኒ፡ ዘተገብረ፡ በመትሕተ፡ ፀሐይ።
11 ዘይነብብ፡ ወይብል፡ ናሁ፡ ዝ፡ ሐዲስ፡ ውእቱ፡ ወናሁ፡ ተገብረ፡ ዓለም፡ እምዓለም፡ ዘኮነ፡ እምቅድሜነ።
12 አልቦሙ፡ ዝክር፡ ለቀደምት፡ ምስለ፡ ደኃርት፡ ወለእለ፡ ደኃርትኒ፡ ምስለ፡ ዘይትገበር፡ በደኃርት።
13 አነ፡ መክብብ፡ ኮንኩ፡ ንጉሠ፡ እስራኤል፡ በኢየሩሳሌም።
14 ወወሀብኩ፡ ልብየ፡ ለኃሢሥ፡ ወለፈቲን፡ በጥበብ፡ በእንተ፡ ኵሉ፡ ዘተገብረ፡ መትሕተ፡ ፀሐይ፡ እስመ፡ ሥራኀ፡ እኩየ፡ ወሀበ፡ እግዚአብሔር፡ ለውሉደ፡ ሰብእ፡ ከመ፡ ይሥርኁ፡ ቦቱ።
15 ርኢኩ፡ ኵሎ፡ ፍጥረተ፡ ዘተገብረ፡ በመትሕተ፡ ፀሐይ፡ ወናሁ፡ ኵሉ፡ ከንቱ፡ ወፍትወተ፡ መንፈስ።
16 ጠዋይ፡ ኢይክል፡ ረቲዐ፡ ወሕፁፅ፡ ኢይክል፡ ተኈልቆ።
17 ተናገርኩ፡ አነ፡ በልብየ፡ በብሂል፡ ወናሁ፡ አፈድፈድኩ፡ ወአዕበይኩ፡ ጥበበ፡ እምእለ፡ ኮኑ፡ እምቅድሜየ፡ በኢየሩሳሌም፡ ወልብየ፡ ርእየት፡ ብዙኀ፡ ጥበበ፡ ወአእምሮ።
18 ወወሀብኩ፡ ልብየ፡ ለአእምሮ፡ ወለጥበብ፡ ጥበበ፡ ወአእምሮ፡ ወምሳሌ፡ ወትምህርተ፡ አእመርኩ፡ እስመ፡ ዝኒ፡ ከንቱ፡ ወፍትወተ፡ መንፈስ።
19 እስመ፡ በብዝኀ፡ ጥብ፡ ብዙኅ፡ ኀዘን፡ ወዘአፈድፈደ፡ አእምሮ፡ አፈድፈደ፡ ሕማመ።