Ecclesiastes 11

aligned by seat — same row, same verse, whatever each bible numbers it

← 10 12 →
vGeez
1 ፈኑ፡ ኅብስተከ፡ ውስተ፡ ገጸ፡ ማይ፡ እስመ፡ በብዙኅ፡ መዋዕል፡ ትረክቦ።
2 ሀብ፡ መክፈልተከ፡ ለሰብዓቱ፡ ወለሰመንቱ፡ እስመ፡ ኢተአምር፡ ዘይከውን፡ እኩየ፡ ውስተ፡ ምድር።
3 እመ፡ መልአ፡ ደመና፡ ይክዑ፡ ዝናመ፡ ውስተ፡ ምድር፡ ወለእመ፡ ወድቀ፡ ዕፅ፡ ደቡበ፡ ወእመኒ፡ ሰሜነ፡ ወእደ፡ ወድቀ፡ ዕፅ፡ ህየ፡ ይሄሉ።
4 ዘየዓቅብ፡ ነፋሰ፡ ኢይዘርእ፡ ወዘይኔጽር፡ ደመናተ፡ ኢየዓፅድ።
5 እስመ፡ አልቦ፡ ዘየአምር፡ ምንት፡ ውእቱ፡ ፍኖተ፡ መንፈስ፡ ከመ፡ አዕፅምት፡ ውስተ፡ ከርሠ፡ ጽንስት፡ ከማሁ፡ ኢይትአመር፡ ግበሩ፡ ለእግዚአብሔር፡ መጠነ፡ ገብረ፡ ኵሎ፡ ኅቡረ።
6 በነግህ፡ ዝራእ፡ ዘርአከ፡ ወበምሴትኒ፡ ኢትኅድግ፡ እዴከ፡ እስመ፡ ኢተአምር፡ አይ፡ ዘይከውን፡ እምዝ፡ ወእምዝ፡ ወእመ፡ ክልኤሆሙሰ፡ ኅቡረ፡ ሠናይ።
7 ጥዑም፡ ብርሃን፡ ወሠናይ፡ ለአዕይንት፡ ለርእየ፡ ኅብረ፡ ፀሐይ።
8 እስመ፡ እመኒ፡ ዓመታተ፡ ብዙኀ፡ ሐይወ፡ ሰብእ፡ ወበኵሎን፡ ይትፌሣሕ፡ ወኢይዜከር፡ መዋዕለ፡ ጽልመት፡ ከመ፡ ብዙኃተ፡ ይከውና፡ ኵሉ፡ ዘይመጽእ፡ ከንቱ፡ ተፈሣሕ፡ ኦ፡ ብእሲ፡ በውርዙትከ።
9 ወትሠኒ፡ ልብከ፡ በመዋዕለ፡ ውርዙትከ፡ ወሑር፡ በፍኖተ፡ ልብከ፡ ዘበንጽሕ፡ ወኢበርእየ፡ ዓይንከወአእምር፡ ከመ፡ በእንተዝ፡ ኵሉ፡ ያቀርበከ፡ እግዚአብሔር፡ ለኵነኔ።
10 ወአርኅቅ፡ መዓተ፡ እምልብከ፡ ወአግኅሥ፡ እከየ፡ እምሥጋከ፡ እስመ፡ ውርዙት፡ ወጸሊመ፡ ሥሥዕርት፡ በኢያእምሮ፡ ከንቱ፡ ውእቱ።