4 Baruch 1
aligned by seat — same row, same verse, whatever each bible numbers it
| v | Geez |
|---|---|
| 1 | ክፍል ፩። ወኮነ፡ ሶበ፡ ፄወዎሙ፡ ለደቂቀ፡ እስራኤል፡ ንጉሠ፡ ከላዴዎን፡ ነበቦ፡ እግዚአብሔር፡ ለኤርምያስ፡ ወይቤሎ፡ ኤርምያስ፡ ኅሩይየ፡ ተንሥእ፡ ወፃእ፡ እምዛቲ፡ ሀገር፡ አንተ፡ ወባሮክ፡ እስመ፡ ሀሎኩ፡ ኣማስና፡ እምብዝኀ፡ ኀጢአቶሙ፡ ለእለ፡ ይነብሩ፡ ውስቴታ፤ እስመ፡ ጸሎትከኒ፡ ከመ፡ ዐምድ፡ ጽኑዕ፡ በማእከለ፡ ሀገር፡ ወከመ፡ ቅጽር፡ ዘአድማስ፡ ዐውዳ፤ ወይእዜኒ፡ ተንሥኡ፡ ወሖሩ፡ ወፃኡ፡ ዘእንበለ፡ ይምጻእ፡ ኀይለ፡ ከላዴዎን፡ ወይዑዳ፡ ለሀገር። ወነበበ፡ ኤርምያስ፡ እንዘ፡ ይብል፡ ኣስተበቍዐከ፡ እግዚእየ፡ አዝዞ፡ ለገብርከ፡ ከመ፡ ይትናገር፡ ቅድሜከ፡ ወይቤሎ፡ እግዚአብሔር፡ ንብብ፡ ኅሩይየ፡ ኤርምያስ። ወነበበ፡ ኤርምያስ፡ ወይቤ፡ እግዚኦ፡ ዘኵሎ፡ ትእኅዝ፡ ትሜጡኑ፡ ዛተ፡ ሀገረ፡ ኅሪተ፡ ውስተ፡ እዴሆሙ፡ ለከላዴዎን፡ ከመ፡ ይዘኀር፡ ንጉሥ፡ ምስለ፡ ሕዘቢሁ፡ ወይበል፡ ተኀየልኩ፡ ውእተ፡ ሀገረ፡ ዘአምላክ፤ ሓሰ፡ እግዚኦ፡ እመሰ፡ ፈቀድከ፡ ውእቱ፡ በእዴከ፡ ታማስና። ወይቤሎ፡ እግዚእ፡ ለኤርምያስ፡ እስመ፡ ኅሩይየ፡ አንተ፡ ተንሥእ፡ ውፃኡ፡ አንተ፡ ወባሮክ፡ እስመ፡ ሀሎኩ፡ ኣማስና፡ በኀጢአቶሙ፡ ለእለ፡ ይነብሩ፡ ውስቴታ፤ ውኢንጉሥ፡ ወኢኀይለ፡ ዚአሁ፡ ኢይክል፡ በዊአ፡ ውስተ፡ ሀገር፡ ለእመ፡ አነ፡ ኢቀደምኩ፡ ወኢያርኀውኩ፡ አናቅጺሃ፤ ተንሥእ፡ ይእዜኒ፡ ወሖር፡ ኀበ፡ ባሮክ፡ ወዜንዎ፡ ዘንተ፡ ነገረ፤ ወተንሢአክሙ፡ ሶበ፡ ኮነ፡ ስድስቱ፡ ሰዓት፡ ዘሌሊት፡ ንዑ፡ ውስተ፡ ቅጽረ፡ ሀገር፡ ወአነ፡ ኣርእየክሙ፡ ወለእመ፡ አነ፡ ኢቀደምኩ፡ አማስኖታ፡ ለሀገር፡ ኢይክሉ፡ በዊኦታ። ወዘንተ፡ ብሂሎ፡ እግዚእ፡ ኀለፈ፡ እምኀበ፡ ኤርምያስ። |