1 Meqabyan 31
aligned by seat — same row, same verse, whatever each bible numbers it
| v | Geez |
|---|---|
| 1 | ነገሥትኒ፡ ኢይሠየሙ፡ ዘእንበለ፡ ፈቃድየ፡ ወምስኪናንኒ፡ ኢይነደዩ፡ ዘእንበለ፡ በትእዛዝየ፡ ወኃያላን፡ እይፀንዑ፡ ዘእንበለ፡ በፈቃድየ። |
| 2 | ወአነ፡ አሀብክዎ፡ ለዳዊት፡ ሞገሰ፡ ወጥበበ፡ ለሰሎሞን፡ ወአነ፡ ወሰክዎ፡ ዓመታተ፡ ለሕዝቅያስ። |
| 3 | ወአነ፡ አሕፀዕኩ፡ መዋዕሊሁ፡ ለጎልያድ፡ ወአነ፡ ወሀብክዎ፡ ኃይለ፡ ለሶምሶን፡ ወካዕበ፡ አድከምኩ፡ ኃይሎ። |
| 4 | ወአድኀንክዎ፡ አነ፡ ለዳዊት፡ ገብርየ፡ እምእደ፡ ጎልያድ፡ ረአይታዊ። |
| 5 | ወዓዲ፡ እምእደ፡ ሳኦል፡ ንጉሥ፡ ወዓዲ፡ እምእደ፡ ካልዑ፡ ረዓይታዊ፡ ዘይትቃወሞ፡ ወእምእደ፡ ኵሎሙ፡ እለ፡ ይትቃወምዎ፡ ወይትቃረንዎ፡ እስመ፡ ዓቀበ፡ ትእዛዝየ። |
| 6 | ወአነሂ፡ አፍቀርኩ፡ ኪያሁ፡ ወለኵሎሙ፡ እለ፡ የዓቅቡ፡ ትእዛዝየ፡ ነገሥት፡ ወመኳንንት፡ አነሂ፡ አፈቅሮሙ፡ ወእሁቦሙ፡ ኃይለ፡ ወመዊዓ፡ በላዕለ፡ ፀሮሙ። እስመ፡ ውእቶሙኒ፡ አስተፍሥሁኒ። |
| 7 | ወካዕበ፡ እሁቦሙ፡ ምድረ፡ ርስት፡ እንተ፡ መሐልኩ፡ ለአበዊሆሙ፡ ምድረ፡ ንጽሕተ፡ ወብርህተ፡ ከመ፡ ይትዋረሱ፡ ምድረ፡ አበዊሆሙ። |