1 Enoch 9

aligned by seat — same row, same verse, whatever each bible numbers it

← 8 10 →
vGeez
1 ወአሜሃ፡ ሐወጹ፡ ሚካኤል፡ ወገብርኤል፡ ወሱሩያል፡ ወኡርያል፡ እምሰማይ፡ ወርእዩ፡ ብዙኀ፡ ደመ፡ ዘይትከዐው፡ በዲበ፡ ምድር፡ ወኵሎ፡ ዐመፃ፡ ዘይትገበር፡ በዲበ፡ ምድር።
2 ወይቤሉ፡ በበይናቲሆሙ፡ ቃለ፡ ጽራሐቲሆሙ፡ ዕራቃ፡ ጸርሐት፡ ምድር፡ እስከ፡ አንቀጸ፡ ሰማይ።
3 ወይእዜኒ፡ ኦ፡ ቅዱሳነ፡ ሰማይ፡ ለክሙ፡ ይሰክዩ፡ ነፍሳተ፡ ሰብእ፡ እንዘ፡ ይብሉ፡ አብኡ፡ ለነ፡ ፍትሐ፡ ኀበ፡ ልዑል።
4 ወይቤሉ፡ ለእግዚኦሙ፡ ለንጉሥ፡ እስመ፡ እግዚኦሙ፡ ለአጋእዝት፡ ወአምላኮሙ፡ ለአማልክት፡ ወንጉሦሙ፡ ለነገሥት፡ ወመንበረ፡ ስብሐቲሁ፡ ውስተ፡ ኵሉ፡ ትውልድ፡ ዘለዓለም፡ ወስምከ፡ ቅዱስ፡ ወስቡሕ፡ ውስተ፡ ኵሉ፡ ትውልድ፡ ዓለም፡ ወቡሩክ፡ ወስቡሕ።
5 አንተ፡ ወገበርከ፡ ኵሎ፡ ወሥልጣነ፡ ኵሉ፡ ምስሌከ፡ ወኵሉ፡ ክሡት፡ በቅድሜከ፡ ወግሁድ፡ ወአንተ፡ ትሬኢ፡ ኵሎ፡ ወአልቦ፡ ዘይትከሀል፡ ይትኀባእ፡ እምኔከ።
6 ርኢኬ፡ ዘገብረ፡ አዛዝኤል፡ ዘከመ፡ መሀረ፡ ኵሎ፡ ዐመፃ፡ በዲበ፡ ምድር፡ ወአግሀደ፡ ኅቡኣተ፡ ዓለም፡ እለ፡ ይትገበራ፡ በሰማያት።
7 ወአመረ፡ ስብዓታተ፡ ስማዝያ፡ ዘአንተ፡ ወሀብኮ፡ ሥልጣነ፡ ከመ፡ ይኰንን፡ እለ፡ ምስሌሁ፡ ኅቡረ።
8 ወሖሩ፡ ኀበ፡ አዋልደ፡ ሰብእ፡ ኅቡረ፡ ወሰከቡ፡ ምስሌሆን፡ ለእልኩ፡ አንስት፡ ወረኵሱ፡ ወአግሀዱ፡ ሎን፡ እሎንተ፡ ኃጣውአ።
9 ወአንስትኒ፡ ወለዳ፡ ረዓይተ፡ ወበዝ፡ መልአት፡ ኵላ፡ ምድር፡ ደመ፡ ወዐመፃ።
10 ወይእዜኒ፡ ናሁ፡ ይጸርሑ፡ ነፍሳተ፡ እለ፡ ሞቱ፡ ወይሰክዩ፡ እስከ፡ አንቀጸ፡ ሰማይ፡ ወዐርገ፡ ገዐሮሙ፡ ወኢይክሉ፡ ወፂአ፡ እምቅድመ፡ ገጸ፡ ዐመፃ፡ ዘይትገበር፡ በዲበ፡ ምድር።
11 ወአንተ፡ ተአምር፡ ኵሎ፡ ዘእንበለ፡ ይኩን፡ ወአንተ፡ ተአምር፡ ዘንተ፡ ወዘዚኣሆሙ፡ ወአልቦ፡ ዘትነግረነ፡ ወምንት፡ መፍትው፡ ንረስዮሙ፡ በእንተ፡ ዝንቱ።