1 Enoch 41

aligned by seat — same row, same verse, whatever each bible numbers it

← 40 42 →
vGeez
1 ወእምድኅረ፡ ዝ፡ ርኢኩ፡ ኵሎ፡ ኅቡኣቲሆሙ፡ ለሰማያት፡ ወመንግሥት፡ እፎ፡ ትትከፈል፡ ወተግባረ፡ ሰብእ፡ ከመ፡ በመዳልው፡ ይዴለው።
2 ወበህየ፡ ርኢኩ፡ ማኅደሪሆሙ፡ ለቅዱሳን፡ ወማኅደሮሙ፡ ለኅሩያን፡ ወርእያ፡ አዕይንትየ፡ በህየ፡ ኵሎሙ፡ ኃጥኣን፡ እንዘ፡ ይሰደዱ፡ እምህየ፡ እለ፡ ይክሕድዎ፡ ለስመ፡ እግዚአ፡ መናፍስት፡ ወይስሕብዎሙ፡ ወቀዊመ፡ አልቦሙ፡ በመቅሠፍት፡ እንተ፡ ትወፅእ፡ እምእግዚአ፡ መናፍስት።
3 ወበህየ፡ ርእያ፡ አዕይንትየ፡ ኅቡኣተ፡ መባርቅተ፡ ወነጐድጓድ፡ ወኅቡኣተ፡ ነፋሳተ፡ ወእፎ፡ ይትከፈሉ፡ ከመ፡ ይንፍኁ፡ ዲበ፡ ምድር፡ ወኅቡኣተ፡ ደመና፡ ወጠል፡ ወበህየ፡ ርኢኩ፡ እምኀበ፡ ይወፅእ፡ በውእቱ፡ መካን፡ ወእምህየ፡ ይጸግቡ፡ ጸበለ፡ ምድር።
4 ወበህየ፡ ርኢኩ፡ መዛግብተ፡ ዕፅዋነ፡ ወእምኔሆሙ፡ ይትከፈሉ፡ ነፋሳት፡ ወመዝገበ፡ በረድ፡ ወመዝገበ፡ ጊሜ፡ ወዘደመናት፡ ወደመና፡ ዚኣሁ፡ እምላዕለ፡ ምድር፡ የኀድር፡ እምቅድመ፡ ዓለም።
5 ወርኢኩ፡ መዛግብተ፡ ፀሓይ፡ ወዘወርኅ፡ ወእምአይቴ፡ ይወፅኡ፡ ወአይቴ፡ ይገብኡ፡ ወግብአቶሙ፡ ስቡሕ፡ ወእፎ፡ ይከብር፡ አሐዱ፡ እምካልኡ፡ ወምሕዋሮሙ፡ ብዑል፡ ወኢየኀልፉ፡ ምሕዋረ፡ ወኢይዌስኩ፡ ወኢያሐጽጹ፡ ምሕዋረ፡ ዚኣሆሙ፡ ወሃይማኖቶሙ፡ የዐቅቡ፡ አሐዱ፡ ምስለ፡ ካልኡ፡ በመሐላ፡ ዘነበሩ።
6 ወይወፅእ፡ ቅድመ፡ ፀሓይ፡ ወይገብር፡ ፍኖቶ፡ በትእዛዘ፡ እግዚአ፡ መናፍስት፡ ወይጸንዕ፡ ስሙ፡ ለዓለመ፡ ዓለም።
7 ወእምድኅረ፡ ዝ፡ ርኢኩ፡ ፍኖተ፡ ዘኅቡእ፡ ወዘክሡት፡ ዘወርኅ፡ ወምሕዋረ፡ ፍኖቱ፡ ይፌጽም፡ በውእቱ፡ መካን፡ በመዓልት፡ ወበሌሊት፡ ወአሐዱ፡ ለካልኡ፡ ይኔጽሮ፡ በቅድመ፡ እግዚአ፡ መናፍስት፡ ወየአኵቱ፡ ወይሴብሑ፡ ወኢየዐርፉ፡ እስመ፡ አኰቴቶሙ፡ ዕረፍቶሙ፡ ውእቱ፡ ሎሙ።
8 እስመ፡ ፀሓይ፡ ብሩህ፡ ብዙኅ፡ ሙያጤ፡ ቦቱ፡ ለበረከት፡ ወለመርገም፡ ወምርዋጸ፡ ፍኖቱ፡ ለወርኅ፡ ለጻድቃን፡ ብርሃን፡ ወለኃጥኣን፡ ጽልመት፡ በስሙ፡ ለእግዚአ፡ መናፍስት፡ ዘፈጠረ፡ ማእከለ፡ ብርሃን፡ ወማእከለ፡ ጽልመት፡ ወከፈለ፡ መንፈሰ፡ ለሰብእ፡ ወአጽንዐ፡ መንፈሶሙ፡ ለጻድቃን፡ በስመ፡ ጽድቀ፡ ዚኣሁ።
9 እስመ፡ መልአክ፡ ኢይከልእ፡ ወሥልጣን፡ ኢይክል፡ ከሊአ፡ እስመ፡ መኰንን፡ ለኵሎሙ፡ ይሬኢ፡ ወእሎንተ፡ ኵሎሙ፡ በቅድሜሁ፡ ውእቱ፡ ይኴንን።