Hover a verse for quick parallels · click it for the full panel across Bibles & notes.
1 ወተንሥአ፡ ኤልያስ፡ ነቢይ፡ ዘከመ፡ እሳት፡ ወቃሉኒ፡ ከመ፡ ነድ፡ ያውዒ።
2 ወአምጽአ፡ ረኃብ፡ ላዕሌሆሙ፡ ወበቅንአቱ፡ አውኀዶሙ።
3 ወበቃለ፡ እግዚአብሔር፡ ከልኦ፡ ለሰማይ፡ ወአውረደ፡ እሳተ፡ እምሰማይ፡ ሥልሰ።
4 እፎ፡ ተሰባሕከ፡ ኤልያስ፡ በስብሐቲከ፡ ወመኑ፡ ተመክሐ፡ ከማከ።
5 ዘአንሥአ፡ በድነ፡ እምነ፡ ምውታን፡ ወእምነ፡ መቃብርኒ፡ በቃለ፡ ልዑል።
6 ወአውረዶሙ፡ ለነገሥት፡ ውስተ፡ ሞት፡ ወለክቡራን፡ እመነ፡ ዓራታቲሆሙ።
7 ዘያ[ፀምእ፡]ኵነኔ፡ በሲና፡ ወበኮሬብ፡ ፍትሐ፡ ወበቀለ።
8 ዘይቀብኦሙ፡ ለነገሥት፡ ወይትፈድዮሙ፡ ወተዐለዉ፡ ነቢያት፡ እምኔሁ።
9 ዘዐርገ፡ በነደ፡ እሳት፡ በሰረገላት፡ ወበአፍራስ፡ ዘእሳት።
10 ዘአጽሐፈ፡ ኵነኔ፡ ለዕድሜሁ፡ ከመ፡ ያቊርር፡ መዐተ፡ እምቅድመ፡ መቅሠፍት፡ ወከመ፡ ያግብእ፡ ልበ፡ አብ፡ ኀበ፡ ውሉድ፡ ወከመ፡ ያቅሞሙ፡ ለአሕዛበ፡ ያዕቆብ።
11 ብፁዓን፡ እለ፡ ያአምሩከ፡ ወእለ፡ ስርግዋን፡ በፍቅርከ፡ ወንሕነሂ፡ ሕይወተ፡ ነሐዩ፡(በእንቲአከ)።
12 ኤልያስ፡ ዘዐርገ፡ በነደ፡ እሳት፡ ወኤልሳዕኒ፡ ዘመልአ፡ ላዕሌሁ፡ እምነ፡ መንፈሱ፡(ቅዱስ)፡ወበመዋዕሊሁኒ፡ ኢያደንግጽዎ፡ መላእክት፡ ወአልቦ፡ ዘተዐገሎ፡ ወኢመኑሂ።
13 ወእምኵሉ፡ ነገር፡ አልቦ፡ ዘተስእኖ፡ ወመዊቶሂ፡ ተነበየ፡ በድኑ።
14 ወበሕይወቱሂ፡ ገብረ፡ ነኪረ፡ ወመሞቱሂ፡ ዕጹብ፡ ግብሩ።
15 ወምስለዝ፡ ኵሉ፡ ኢነስሑ፡ ሕዝብ፡ ወኢኀደጉ፡ ጌጋዮሙ፡ እስከ፡ ተፄወዉ፡ እምነ፡ ብሔሮሙ፡ ወተዘርዉ፡ ውስተ፡ ኵሉ፡ ምድር፡ ወተርፉ፡ ኅዳጣን፡ እምውስተ፡ ሕዝብ፡ ወመልአ[ክ]፡ እምነ፡ ቤተ፡ ዳዊት።
16 ወቦ፡ እምውስቴቶሙ፡ እለ፡ ገብሩ፡ ሠናየ፡ ወቦ፡ እለ፡ አብዝኅዋ፡ ለኃጢአት።
17 ወሕዝቅያስኒ፡ አጽንዐ፡ ሀገሮ፡ ወአብአ፡ ማየ፡ ማእከላ፡ ወአውቀረ፡ ኰኵሐ፡ በኀጺን፡ ወሐነጸ፡ ምዕቃለ፡ ማይ።
18 ወዐርገ፡ ስናክሬም፡ በመዋዕሊሁ፡ ወለአኮ፡ ለረፍስቂስ፡ ወሖረ፡ ኀቤሁ፡ ወአንስአ፡ እዴሁ፡ ላዕለ፡ ጽዮን፡ ወተዘኀረ፡ ወአዕበየ፡ አፉሁ።
19 ወውእተ፡ አሚረ፡ ደንገጾሙ፡ ልቦሙ፡ ወእደዊሆሙ፡ ወሐሙ፡ ከመ፡ እንተ፡ ትውልድ።
20 ወጸውዕዎ፡ ለአእግዚአብሔር፡ ለመሓሪ፡ ወአንሥኡ፡ እደዊሆሙ፡ ኀቤሁ፡ ወፍጡነ፡ ሰምዖሙ፡ ቅዱስ፡ እምሰማይ፡ ወቤዘዎሙ፡ በእደዊሁ፡ ለ[ኢሳይያስ]።
21 ወቀተሎሙ፡ ተዓይኒሆሙ፡ ለፋርስ፡ ወቀጥቀጦሙ፡ መልአኩ።
22 እስመ፡ ገብረ፡ ሕዝቅያስ፡ ዘይኤድሞ፡ ለእግዘአብሔር፡ ወአጽንዐ፡ [እኂዘ፡]ፍናዌ፡ ዳዊት፡ አቡሁ፡ በከመ፡ አዘዘ፡ ኢሳይያስ፡ ነቢይ፡ ወምእመን፡ ውእቱ፡ ወዐቢይ፡ ራእዩ።
23 ወተፀርዐት፡ ፀሓይ፡ በመዋዕሊሁ፡ ወወሰኮ፡ ዓመቲሁ፡ ለንጉሥ።
24 ወበዐቢይ፡ መንፈስ፡ ርእየ፡ ደኃሪተ፡ ወአስተፍሥሖሙ፡ ለእለ፡ ይላሕዉ፡ በጽዮን።
25 ወነገረ፡ ዘይከውን፡ ለዓለም፡ ወዘኒ፡ ኅቡእ፡ ዘእንበለ፡ ይኩን።