1 ወይቤላ፡ ኤልሳዕ፡ ለእንታክቲ፡ ብእሲት፡ እንተ፡ አሕየወ፡ ላቲ፡ ወልዳ፡ ተንሥኢ፡ ወሖሪ፡ አንቲኒ፡ ወቤትኪ፡ ወንበሪ፡ ኀበ፡ ነበርኪ፡ ትካት፡ እስመ፡ ረኃበ፡ ይፌኑ፡ እግዚአብሔር፡ ውስተ፡ ምድር፡ ወእምዝ፡ መጽአ፡ ረኃብ፡ ውስተ፡ ምድር፡ ፯ዓመተ።
2 ወተንሥአት፡ ይእቲ፡ ብእሲት፡ ወገብረት፡ በከመ፡ ይቤላ፡ ኤልሳዕ፡ ወሖረት፡ ብሔረ፡ ኢሎፍሊ፡ ወነበረት፡ ፯ዓመተ።
3 ወእምድኅረ፡ ኀለፈ፡ ፯ዓመት፡ አተወት፡ ይእቲ፡ ብእሲት፡ ወገብአት፡ እምብሔረ፡ ኢሎፍሊ፡ ወሖረት፡ ወዐውየወት፡ ኀበ፡ ንጉሥ፡ በእንተ፡ ቤታ፡ ወበእንተ፡ አዕጻዳቲሃ።
4 ወተስእሎ፡ ንጉሥ፡ ለግያዝ፡ ወልዱ፡ ለኤልሳዕ፡ ለብእሴ፡ እግዚአብሔር፡ ወይቤሎ፡ ንግረኒ፡ ኵሎ፡ ነገረ፡ ነኪር፡ ዘገብረ፡ ኤልሳዕ።
5 ወእምዝ፡ እንዘ፡ ይነግሮ፡ ለንጉሥ፡ ዘከመ፡ አሕየወ፡ ሕፃነ፡ ዘሞተ፡ ወመጽአት፡ ይእቲ፡ ብእሲት፡ እንተ፡ አሕየወ፡ ላቲ፡ ኤልሳዕ፡ ሕፃና፡ ዐውየወት፡ ኀበ፡ ንጉሥ፡ በእንተ፡ ቤታ፡ ወበእንተ፡ አዕጻዳቲሃ፡ ወይቤሎ፡ ግያዝ፡ እግዚኦ፡ ንጉሥ፡ ነያ፡ ይእቲ፡ ብእሲት፡ ወነዋ፡ ሕፃናሂ፡ ዘአሕየወ፡ ኤልሳዕ።
6 ወተስእለ፡ ንጉሥ፡ ወነገረቶ፡ ወወሀባ፡ ንጉሥ፡ ፩እምውስተ፡ ኅጽዋኑ፡ ወይቤሎ፡ አግብእ፡ ላቲ፡ ኵሎ፡ ንዋያ፡ ወኵሎ፡ እክለ፡ አዕጻዳቲሃ፡ ዘእምአመ፡ ኀደገት፡ ብሔራ፡ ወእስከ፡ ዘይእዜ።
7 ወሖረ፡ ኤልሳዕ፡ ብሔረ፡ ደማስቆ፡ ወደወየ፡ ወልደ፡ አዴር፡ ንጉሠ፡ ሶርያ፡ ወነገርዎ፡ ወይቤልዎ፡ መጽአ፡ ብእሴ፡ እግዚአብሔር፡ ዝየ።
8 ወይቤሎ፡ ለአዛሔል፡ ንሣእ፡ መና፡ ምስሌከ፡ ወሖር፡ ተቀበሎ፡ ለብእሴ፡ እግዚአብሔር፡ ወተሰአሎ፡ ቃለ፡ እግዚአብሔር፡ እመ፡ አሐዩ፡ እምነ፡ ዝንቱ፡ ደዌየ።
9 ወሖረ፡ አዛሔል፡ ወተቀበሎ፡ ወነሥአ፡ መና፡ ምስሌሁ፡ ወእምውስተ፡ ኵሉ፡ ሠናይ፡ ዘብሔረ፡ ደማስቆ፡ ወ፵ገምል፡ ይጸውሩ፡ አርሶን፡ ወሖረ፡ ወበጽሐ፡ ኀቤሁ፡ ወይቤሎ፡ ለኤልሳዕ፡ ወልድከ፡ ወልደ፡ አዴር፡ ንጉሠ፡ ሶርያ፡ ፈነወኒ፡ ኀቤከ፡ እንዘ፡ ይብል፡ አሐዩኑአ፡ እምነአ፡ ዝአ፡ ደዌየአ።
10 ወይቤሎ፡ ኤልሳዕ፡ ሖር፡ በሎ፡ ሐዪወሰአ፡ ኢተሐዩአ፡ አንተአ፡ ወአርአየኒ፡ እግዚአብሔር፡ ከመ፡ ሞተ፡ ትመውት።
11 ወበጽሐ፡ ቅድመ፡ ገጹ፡ ወኀፈረ፡ ብእሴ፡ እግዚአብሔር፡ ወበከየ።
12 ወይቤሎ፡ አዛሔል፡ ምንተ፡ ያበኪዮ፡ ለእግዚእየ፡ ወይቤሎ፡ ኤልሳዕ፡ ኣአምር፡ መጠነ፡ ሀለወከ፡ ትረስዮሙ፡ ለደቂቀ፡ እስራኤል ፤ አህጉሪሆሙ፡ ታውዒ፡ በእሳት፡ ወትቀትል፡ ኄሮሙ፡ በኲናት፡ ወትነፅር፡ ሕፃናቲሆሙ፡ ወታነ[ቅ]ዖን፡ ለፅኑሳቲሆሙ።
13 ወይቤሎ፡ አዛሔል፡ ምንትኑ፡ አነ፡ ገብርከ፡ ዘከመ፡ ከልብ፡ ምውት፡ ከመ፡ እግበሮ፡ ለዝንቱ፡ ነገር፡ ወይቤሎ፡ ኤልሳዕ፡ አርአየኒ፡ እግዚአብሔር፡ ኪያከ፡ እንዘ፡ ትነግሥ፡ ለሶርያ።
14 ወእምዝ፡ አተወ፡ እምኀበ፡ ኤልሳዕ፡ ወቦአ፡ ኀበ፡ እግዚኡ፡ ወይቤሎ፡ ምንተ፡ ይቤለከ፡ ኤልሳዕ፡ ወይቤ፡ ይቤለኒ፡ ሐዪወአ፡ ተሐዩአ።
15 ወእምዝ፡ በሳኒታ፡ ነሥአ፡ ክዳነ፡ ወጠምዐ፡ ውስተ፡ ማይ፡ ወተገልበበ፡ ገጻ፡ ወሞተ፡ ወነግሠ፡ አዛሔል፡ ህየንቴሁ ፤ አመ፡ ፭ዓመተ፡ መንግሥቱ፡ ለኢዮራም፡ ወልደ፡ አካአብ፡ ንጉሠ፡ እስራኤል፡ ወኢዮሳፍጥ፡ ንጉሠ፡ ይሁዳ።
16 [ወኢዮራም፡ ንጉሠ፡ ይሁዳ፡] ፴ወ፪ዓመቱ፡ ሎቱ፡ አመ፡ ይነግሥ፡ ወ፰ክረምተ፡ ነግሠ፡ በኢየሩሳሌም።
17 ወሖረ፡ በፍኖቶሙ፡ ለነገሥተ፡ እስራኤል፡ በከመ፡ ገብረ፡ ቤተ፡ አካአብ፡ እስመ፡ ወለተ፡ አካአብ፡ ያወስብ፡ ወገብረ፡ እኩየ፡ ቅድመ፡ እግዚአብሔር።
18 ወኢፈቀደ፡ እግዚአብሔር፡ ያማስኖሙ፡ ለይሁዳ፡ እንበይነ፡ ዳዊት፡ ገብሩ፡ በከመ፡ ይቤሎ፡ የሀቦ፡ ማኅቶተ፡ ለወልዱ፡ በኵሉ፡ መዋዕል።
20 ወበመዋዕሊሁ፡ አፅረሩ፡ ኤዶም፡ ወዐለውዎሙ፡ ለይሁዳ፡ ወአንገሡ፡ ሎሙ፡ ለሊሆሙ፡ ንጉሠ።
21 ወዐርገ፡ ኢዮራም፡ ውስተ፡ ሲሆር፡ ወኵሉ፡ ሰረገላቲሁ፡ ምስሌሁ፡ ወተንሥአ፡ ወቀተሎሙ፡ ለኤዶም፡ እለ፡ ዐገትዎ፡ ወለመላእክተ፡ ሰረገላቲሆሙ፡ ወእምዝ፡ ጐዩ፡ ወአተዉ፡ አብያቲሆሙ።
22 ወአፅረሩ፡ ኤዶም፡ ወዐለውዎሙ፡ ለይሁዳ፡ እስከ፡ ዮም፡ ወይእተ፡ አሚረ፡ አፅረሩ፡ ሎምና፡ በእማንቱ፡ መዋዕል።
23 ወኵሉ፡ ነገሩ፡ ለኢዮራም፡ ወኵሉ፡ ዘገብረ፡ ናሁ፡ ዝውእቱ፡ ዘጽሑፍ፡ ውስተ፡ መጽሐፈ፡ ነቢያቲሆሙ፡ ለነገሥተ፡ ይሁዳ ።
24 ወሰከበ፡ ኢዮራም፡ ምስለ፡ አበዊሁ፡ ውስተ፡ ሀገረ፡ ዳዊት፡ አቡሁ፡ ወነግሠ፡ አካዝያስ፡ ወልዱ፡ ህየንቴሁ።
25 አመ፡ ፲ወ፪ዓመተ፡ መንግሥቱ፡ ለኢዮራም፡ ወልደ፡ አካአብ፡ ንጉሠ፡ እስራኤል፡ ነግሠ፡ አካዝያስ፡ ወልደ፡ ኢዮራም።
26 እንዘ፡ ፳ወ፪ክራማቲሁ፡ እምዘ፡ ተወልደ፡ አመ፡ ይነግሥ፡ ወ፩ክረምተ፡ ነግሠ፡ ለእስራኤል፡ ወስማ፡ ለእሙ፡ ጎቶልያ፡ ወለተ፡ ዘንበሪ፡ ንጉሠ፡ እስራኤል።
27 ወሖረ፡ በፍኖቶሙ፡ ለቤተ፡ አካአብ፡ ወገብረ፡ እኩየ፡ ቅድመ፡ እግዚአብሔር፡ ከመ፡ ቤተ፡ አካአብ።
28 ወሖረ፡ ምስለ፡ ኢዮራም፡ ወልደ፡ አካአብ፡ ጸብአ፡ ከመ፡ ይቅትልዎ፡ ለአዛሔል፡ ንጉሠ፡ ሶርያ፡ ኢሎፍሊ፡ በሬማት፡ ዘገለዓድ፡ ወአቍስልዎ፡ ሶርያ፡ ለኢዮራም።
29 ወገብአ፡ ኢዮራም፡ ንጉሥ፡ ውስተ፡ እስራኤል፡ ከመ፡ ይትፈወስ፡ ቍስሎ፡ ዘአቍሰልዎ፡ በሬማት፡ አመ፡ ተቃተለ፡ ምስለ፡ አዛሔል፡ ንጉሠ፡ ሶርያ፡ ወአካዝየስ፡ ወልደ፡ ኢዮራም፡ ወረደ፡ ይርአዮ፡ ለኢዮራም፡ ወልደ፡ አካአብ፡ ውስተ፡ እስራኤል፡ እስመ፡ ይደዊ።