1 ወእምዝ፡ አመ፡ ያዐርጎ፡ እግዚአብሔር፡ ለኤልያስ፡ ውስተ፡ ሰማይ፡ ሖሩ፡ ኤልያስ፡ ወኤልሳዕ፡ እምነ፡ ኢያሪኮ።
2 ወይቤሎ፡ ኤልያስ፡ ለኤልሳዕ፡ ንበር፡ ዝየ፡ እስመ፡ ለአከኒ፡ እግዚአብሔር፡ እስከ፡ ቤቴል፡ ወይቤሎ፡ ኤልሳዕ፡ ለኤልያስ፡ ሕያው፡ እግዚአብሔር፡ ወሕያው፡ ነፍስከ፡ ከመ፡ ኢየኀድገከ፡ ወበጽሐ፡ ቤቴል።
3 ወመጽኡ፡ ደቂቀ፡ ነቢያት፡ እለ፡ ውስተ፡ ቤቴል፡ ኀቤሁ፡ ወይቤልዎ፡ ለኤልሳዕ፡ ሶበ፡ ታአምርኑ፡ ከመ፡ ዮም፡ ይነሥኦ፡ እግዚአብሔር፡ ለእግዚእከ፡ እመልዕልተ፡ ርእስከ፡ ወይቤሎሙ፡ አንሰ፡ አእመርኩ፡ አርምሙ።
4 ወይቤሎ፡ ኤልያስ፡ ለኤልሳዕ፡ ንበር፡ ዝየ፡ እስመ፡ እግዚአብሔር፡ ለአከኒ፡ ኢያሪኮ፡ ወይቤሎ፡ ኤልሳዕ፡ ሕያው፡ እግዚአብሔር፡ ወሕያው፡ ነፍስከ፡ ከመ፡ ኢየኀድገከ ፤ ወበጽሑ፡ ኢያሪኮ።
5 ወመጽኡ፡ ደቂቀ፡ ነቢያት፡ እለ፡ ውስተ፡ ኢያሪኮ፡ ኀበ፡ ኤልሳዕ፡ ወይቤልዎ፡ ሶበ፡ ታአምርኑ፡ ከመ፡ ዮም፡ ይነሥኦ፡ እግዚአብሔር፡ ለእግዚእከ፡ እመልዕልተ፡ ርእስከ፡ ወይቤሎሙ፡ አእመርኩ፡ እርምሙ።
6 ወይቤሎ፡ ኤልያስ፡ ለኤልሳዕ፡ ንበር፡ ዝየ፡ እስመ፡ እግዚአብሔር፡ ለአከኒ፡ መንገለ፡ ዮርዳኖስ፡ ወይቤሎ፡ ኤልሳዕ፡ ሕያው፡ እግዚአብሔር፡ ወሕያው፡ ነፍስከ፡ ከመ፡ ኢየኀድገከ፡ ወሖሩ፡ ክልኤሆሙ።
7 ወ፶ዕደው፡ እምነ፡ ደቂቀ፡ ነቢያት፡ ምስሌሆሙ፡ ወቆሙ፡ [እልክቱ] እምርሑቅ፡ አንጻሮሙ፡ ወእሙንቱሰ፡ ቆሙ፡ ክልኤሆሙ፡ ኀበ፡ ዮርዳኖስ።
8 ወነሥአ፡ ኤልያስ፡ ሐሜላቶ፡ ወጦማ፡ ወዘበጣ፡ ለማየ፡ ዮርዳኖስ፡ ወቆመ፡ ማይ፡ እምለፌኒ፡ ወእምለፌኒ፡ ወኀለፉ፡ ክልኤሆሙ፡ ወቆሙ፡ በድወ፡ ወጺኦሙ።
9 ወእምዝ፡ ሶበ፡ ኀለፉ፡ ክልኤሆሙ፡ ይቤሎ፡ ኤልያስ፡ ለኤልሳዕ፡ ሰአለኒ፡ ዘትፈቅድ፡ እግበር፡ ለከ፡ ዘእንበለ፡ እዕርግ፡ እምኀቤከ፡ ወይቤሎ፡ ኤልሳዕ፡ ለኤልያስ፡ ለይኩን፡ ከዕበተ፡ ላዕሌየ፡ መንፈስ፡ ቅዱስ፡ ዘዲቤከ።
10 ወይቤሎ፡ ኤልያስ፡ ዕጹበ፡ ሰአልከ፡ ወባሕቱ፡ ለእመ፡ ርኢከኒ፡ እንዘ፡ አዐርግ፡ እምኀቤከ፡ ለይኩንከ፡ ከማሁ፡ ወእመሰ፡ ኢርኢከኒ፡ ኢይኩንከ።
11 ወእንዘ፡ የሐውሩ፡ ክልኤሆሙ፡ ወይትናገሩ፡ መጽአ፡ ሰረገላ፡ ዘእሳት፡ ወአፍራስ፡ ዘእሳት፡ ወቦአ፡ ማእከለ፡ ክልኤሆሙ፡ ወአስተራሐቆሙ፡ ወዐርገ፡ ኤልያስ፡ ከመ፡ ዘበድልቅልቅ፡ ወከመ፡ ዘውስተ፡ ሰማይ።
12 ወርእዮ፡ ኤልሳዕ፡ ወይቤሎ፡ አባ፡ አባ፡ ኀይሎሙ፡ ለእስራኤል፡ ወጽንዖሙ፡ ወእምዝ፡ ኢርእዮ፡ እንከ፡ ዳግመ፡ ወሠጠጠ፡ አልባሲሁ፡ ወረሰዮሙ፡ ለ፪።
13 ወአውረደ፡ ሎቱ፡ ኤልያስ፡ ሐሜላቶ፡ ወወረደ፡ ላዕለ፡ ርእሱ፡ ለኤልሳዕ፡ ወገብአ፡ ኤልሳዕ፡ ወቆመ፡ ኀበ፡ ድንጋገ፡ ማየ፡ ዮርዳኖስ።
14 ወነሥአ፡ ሐሜላቶ፡ ለኤልያስ፡ እንተ፡ ወረደት፡ መልዕልተ፡ ርእሱ፡ ወዘበጠ፡ ማየ፡ ባቲ፡ ወአበየ፡ ተግሕሦ፡ ወይቤ፡ አይቴ፡ ውእቱ፡ አምላከ፡ ኤልያስ፡ ወእፎ፡ ወእምዝ፡ ዘበጦ፡ ለማይ፡ ወተግሕሠ፡ ወቆመ፡ እንተ፡ ለፌኒ፡ ወእንተ፡ ለፌኒ፡ ወኀለፈ፡ ኤልሳዕ።
15 ወርእይዎ፡ ደቂቀ፡ ነቢያት፡ እለ፡ ውስተ፡ ኢያሪኮ፡ እንዘ፡ ይመጽእ፡ ቅድሜሆሙ፡ ወይቤሉ፡ ገብአ፡ መንፈስ፡ ቅዱስ፡ ዘላዕለ፡ ኤልያስ፡ [ዲበ፡] ኤልሳዕ፡ ወተቀበልዎ፡ ወሰገዱ፡ ሎቱ፡ ውስተ፡ ምድር።
16 ወይቤልዎ፡ ናሁ፡ ሀለዉ፡ ዝየ፡ ምስለ፡ አግብርቲከ፡ ፶ዕደው፡ ደቂቀ፡ ኀይል፡ ይሖሩ፡ ይኅሥሥዎ፡ ለእግዚእከ፡ ዮጊ፡ ረከቦ፡ መንፈሰ፡ እግዚአብሔር፡ ወአውረዶ፡ ውስተ፡ ዮርዳኖስ፡ ወእመ፡ አኮ፡ ውስተ፡ ፩እምነ፡ አድባር፡ ወእመ፡ አኮ፡ ውስተ፡ ፩እምነ፡ አውግር፡ ወይቤሎሙ፡ ኤልሳዕ፡ ኢትፈንዉ።
17 ወአገበርዎ፡ እስከ፡ ኀፈሮሙ፡ ወፈነዉ፡ ፶ዕደወ፡ ወኀሠሥዎ፡ ሠሉሰ፡ መዋዕለ፡ ወኢረከብዎ።
18 ወኤልሳዕሰ፡ ሀለወ፡ ኢያሪኮ፡ ይነብር፡ ወይቤሎሙ፡ ኤልሳዕ፡ ኢይቤለክሙኑ፡ ኢትፈንዉ፡ ወኢትሖሩ።
19 ወይቤልዎ፡ ለኤልሳዕ፡ ሰብአ፡ ይእቲ፡ ሀገር፡ ናሁ፡ ንብረታ፡ ለዛቲ፡ ሀገር፡ ሠናይ፡ በከመ፡ ይሬኢ፡ እግዚአብሔር፡ ወማየ፡ ብሔሩሰ፡ እኩይ፡ ወአንስትኒ፡ ይመክና።
20 ወይቤሎሙ፡ ኤልሳዕ፡ እምጽኡ፡ ሊተ፡ መሳብከ፡ ሐዲሰ፡ ወደዩ፡ ውስቴቱ፡ ፄወ፡ ወአምጽኡ፡ ሎቱ።
21 ወሖረ፡ ኤልሳዕ፡ ኀበ፡ ነቀዐ፡ ማይ፡ ወሶጠ፡ ውስቴቱ፡ ዝኩ፡ ፄወ፡ ወይቤ፡ ከመዝ፡ ይቤ፡ እግዚአብሔር፡ ፈወስክዎአ፡ ለዝአ፡ ማይአ፡ ከመአ፡ አልቦአ፡ ዘይመውትአ፡ እምኔሁአ፡ ወአልቦአ፡ ዘይመክንአ፡ እምኔሁአ።
22 ወእምይእቲ፡ አሚረ፡ ተፈወስ፡ ውእቱ፡ ማይ፡ እስከ፡ ዮም፡ በከመ፡ ነበበ፡ ኤልሳዕ።
23 ወዐርገ፡ እምህየ፡ ውስተ፡ ቤቴል፡ ወእንዘ፡ የዕርግ፡ በፍኖት፡ ረከበ፡ ደቀ፡ ንኡሳነ፡ እንዘ፡ ይወጽኡ፡ እምሀገር፡ ወአኀዙ፡ ይሳለቁ፡ ላዕሌሁ፡ ወይቤልዎ፡ ዕርግ፡ ዕርግ፡ በራሕ።
24 ወሶበ፡ ተመይጠ፡ ድኅሬሁ፡ ወርእዮ[ሙ]፡ ረገሞሙ፡ በስመ፡ እግዚአብሔር፡ ወእምዝ፡ መጽኡ፡ ፪ድብ፡ እምገዳም፡ ወቀተሉ፡ እምውስቴቶሙ፡ ፵ወ፪ደቀ።
25 ወእምህየ፡ ሖረ፡ ደብረ፡ ቀርሜሎስ፡ ወእምህየ፡ ገብአ፡ ሰማርያ።