1 ፩ ፡ በእንተ፡ ክብረ፡ ነገሥት፡ ፍካሬ ፡ ወዜና ፡ ዘ፫፻፲ወ፰ ፡ ርቱዓነ ፡ ሃይማኖት ፡ በእንተ ፡ ክብር ፡ ወዕበይ ፡ ወተድላ ፡ ዘከመ ፡ ወሀበ ፡ እግዚኣብሔር ፡ ለደቂቀ ፡ አዳም ፤ ወፈድፋደሰ ፡ ዘበእንተ ፡ ዕበያ ፡ ወክብራ ፡ ለጽዮን ፡ ታቦተ ፡ ሕጉ ፡ ለእግዚኣብሔር ፡ እንተ ፡ ገባሪሃ ፡ ወኬንያሃ ፡ ለሊሁ ፡ በውስተ ፡ ጽርሐ ፡ መቅደሱ ፡ እምቅድመ ፡ ኵሉ ፡ ፍጥረት ፡ መላእክት ፡ ወሰብእ ፡ እስመ ፡ በኅብረት ፡ ወበሥምረት ፡ ወበዕሪና ፡ ገብርዋ ፡ አብ ፡ ወወልድ ፡ ወመንፈስ ፡ ቅዱስ ፡ ለጽዮን ፡ ሰማያዊት ፡ ለማኅዳረ ፡ ስብሐቲሆሙ ፡ ወእምዝ ፡ ይቤ ፡ አብ ፡ ለወልድ ፡ ወለመንፈስ ፡ ቅዱስ ፡ ንግበር ፡ ሰብአ ፡ በአርአያነ ፡ ወበአምሳሊነ ፤ ወኀብሩ ፡ ወሠምሩ ፡ በዝ ፡ ምክር ፡ ወይቤ ፡ ወልድ ፡ አነ ፡ እለብስ ፡ ሥጋሁ ፡ ለአዳም ፤ ወይቤ ፡ መንፈስ ፡ ቅዱስ ፡ አነ ፡ አኀድር ፡ ውስተ ፡ ልበ ፡ ነቢያት ፡ ወጻድቃን ፡ ወዛቲ ፡ ኅብረት ፡ ወኪዳን ፡ ተገብረት ፡ በውስተ ፡ ጽዮን ፡ ማኅደረ ፡ ስብሐቲሆሙ ፡ ወዳዊትኒ ፡ ይቤ ፡ ተዘከር ፡ ማኅበረከ ፡ ዘአቅደምከ ፡ ፈጢረ ፡ ለመድኀኒተ ፡ በትረ ፡ ርስትከ ፡ በደብረ ፡ ጽዮን ፡ ዘኀደርከ ፡ ውስቴታ ፨ ፡ ወገብሮ ፡ ለአዳም ፡ በዘዚአሁ ፡ አርአያ ፡ ወአምሳል ፡ ከመ ፡ ይንሥቶ ፡ ለሳይጣን ፡ በእንተ ፡ ትዕቢቱ ፡ ምስለ ፡ ሰራዊቱ ፤ ወያቅሞ ፡ ለአዳም ፡ ተክለ ፡ ዚአሁ ፡ ምስለ ፡ ኀራን ፡ ደቂቁ ፡ ለስብሐቲሁ ፡ እስመ ፡ ኅሉቅ ፡ ወምቱር ፡ ምክረ ፡ እግዚኣብሔር ፡ እንተ ፡ ይቤ ፡ እከውን ፡ ሰብአ ፡ ወኣስተርኢ ፡ ለኵሉ ፡ ዘፈጠርኩ ፡ በሥጋ ፡ እትገሰስ ፤ ወበደኃሪ ፡ መዋዕል ፡ በሥምረቱ ፡ ተወልደ ፡ በሥጋ ፡ እምዳግማዊት ፡ ጽዮን ፡ ዳግማዊ ፡ አዳም ፡ ዝውእቱ ፡ መድኀኒነ ፡ ክርስቶስ ፡ ዛቲ ፡ ይእቲ ፡ ምክሕነ ፡ ወሃይማኖትነ ፡ ተስፋነ ፡ ወሕይወትነ ፡ ጽዮን ፡ ሳማያዊት ፨