1 ወኮነ ፡ እምድኅረ ፡ ሞተ ፡ አብርሃም ፡ ባረኮ ፡ እግዚአብሔር ፡ ለይስሐቅ ፡ ወልዱ ፡ ወተንሥአ ፡ እምኬብሮን ፡ ወሖረ ፡ ወኀደረ ፡ ኀበ ፡ ዐዘቅተ ፡ ራእይ ፡ በዓመት ፡ አሐዱ ፡ ዘሣልስ ፡ ሱባዔ ፡ ዘዝ ፡ ኢዩቤሌዉ ፡ ሰብዐተ ፡ ዓመተ ፡ 2 ወበዓመት ፡ ዘሱባዔ ፡ ራብዕ ፡ አኀዘ ፡ ዐባር ፡ ውስተ ፡ ምድር ፡ ዘእንበለ ፡ ቀዳማዊ ፡ ዐባር ፡ ዘኮነ ፡ በመዋዕለ ፡ አብርሃም ።
3 ወአብሰለ ፡ ያዕቆብ ፡ ተብሲለ ፡ ብርስን ፡ ወመጽአ ፡ ዔሳው ፡ እምሐቅል ፡ ርኁብ ፡ ወይቤሎ ፡ ለያዕቆብ ፡ እኁሁ ፡ ሀበኒ ፡ እምዝ ፡ ተብሲል ፡ ዘስርናይ ።
4 ወይቤ ፡ ዔሳው ፡ በልቡ ፡ አነ ፡ እመውት ፡ ለምንትዝ ፡ ቀዲመ ፡ ተወልዶ ፡ ወይቤሎ ፡ ለያዕቆብ ፡ ወሀብኩከ ።
5 ወይቤሎ ፡ ያዕቆብ ፡ መሐል ፡ ሊተ ፡ ዮም ፡ ወመሐላ ፡ ሎቱ ።
6 ወወሀቦ ፡ ያዕቆብ ፡ ለእኁሁ ፡ ዔሳው ፡ ኅብስተ ፡ ወተብሲለ ፡ ወበልዐ ፡ እስከ ፡ ይጸግብ ፡ ወመነነ ፡ ዔሳው ፡ ቀዲመ ፡ ተወልዶ ፡ በእንተዝ ፡ ተሰምየ ፡ ስሙ ፡ ዔሳው ፡ ወኤዶም ፡ በእንተ ፡ ተብሲለ ፡ ስርናይ ፡ ዘወሀቦ ፡ ያዕቆብ ፡ ለቅድመ ፡ ልደቱ ።
7 ወልህቀ ፡ ያዕቆብ ፡ ወዔሳውሰ ፡ ተትሕተ ፡ እምዕበዩ ።
8 ወኮነ ፡ ዐባር ፡ ዲበ ፡ ምድር ፡ ወመጽአ ፡ ይስሐቅ ፡ ይረድ ፡ ግብጽ ፡ በካልእ ፡ ዓመት ፡ ዘዝ ፡ ሱባዔ ፡ ወሖረ ፡ ኀበ ፡ ንጉሠ ፡ ፍልስጥኤም ፡ ጌራሮሃ ፡ ኀበ ፡ አቤሜሌክ ።
9 ወአስተርአዮ ፡ እግዚአብሔር ፡ ወይቤሎ ፡ ኢትረድ ፡ ግብጽ ፡ ንበር ፡ ውስተ ፡ ምድር ፡ እንተ ፡ አነ ፡ እብለከ ፡ ወፍልስ ፡ ውስተ ፡ ይእቲ ፡ ምድር ፡ ወእሄሉ ፡ ምስሌከ ፡ ወእባርከከ ።
10 እስመ ፡ ለከ ፡ ወለዘርእከ ፡ እሁብ ፡ ዛተ ፡ ምድረ ፡ ኵላ ፡ ወአቀውም ፡ መሐላየ ፡ ዘመሐልኩ ፡ ለአብርሃም ፡ አቡከ ፡ ወአበዝኅ ፡ ዘርአከ ፡ ከመ ፡ ከዋክብተ ፡ ሰማይ ።
11 ወይትባረኩ ፡ በዘርእከ ፡ ኵሎሙ ፡ አሕዛበ ፡ ምድር ፡ ህየንተ ፡ ሰምዐ ፡ አቡከ ፡ ቃለ ፡ ዚአየ ፡ ወዐቀበ ፡ ዑቃቤየ ፡ ወትእዛዛትየ ፡ ወሕገጊየ ፡ ወሥርዓትየ ፡ ወኪዳንየ ።
12 ወኀደረ ፡ ጌራሮሃ ፡ ሠለስተ ፡ ሱባዔ ፡ ዓመት ፡ 13 ወአዘዘ ፡ አቤሜሌክ ፡ በእንቲአሁ ፡ ወበእንተ ፡ ኵሉ ፡ ዘዚአሁ ፡ እንዘ ፡ ይብል ፡ ኵሉ ፡ ሰብእ ፡ ዘይለክፎ ፡ ወለኵሉ ፡ ዘዚአሁ ፡ ሞተ ፡ ይሙት ።
14 ወልህቀ ፡ ይስሐቅ ፡ በፍልስጥኤም ፡ ወኮነ ፡ ሎቱ ፡ ጥሪት ፡ ብዙኅ ፡ አልህምት ፡ ወአባግዕ ፡ ወአግማል ፡ ወአእዱግ ፡ ወጥሪት ፡ ብዙኅ ፡ 15 ወዘርኡ ፡ በምድረ ፡ ፍልስጥኤም ።
16 ወኵሎ ፡ ዐዘቃተ ፡ ዘከረዩ ፡ ደቀ ፡ አብርሃም ፡ በሕይወተ ፡ አብርሃም ፡ ይፈንዎ ፡ ፍልስጥኤም ፡ እምድኅረ ፡ ሞተ ፡ አብርሃም ፡ ወመልእዎ ፡ መሬተ ።
17 ወይቤሎ ፡ አቤሜሌክ ፡ ለይስሐቅ ፡ ሖር ፡ እምኀቤነ ፡ እስመ ፡ ዐበይከ ፡ ፈድፋደ ፡ እምኔነ ።
18 ወተመዪጦሙ ፡ ከረዩ ፡ ዐዘቃተ ፡ ዘማያት ፡ ዘከረዩ ፡ ደቀ ፡ አብርሃም ፡ አቡሁ ።
19 ወከረዩ ፡ ደቀ ፡ ይስሐቅ ፡ ዐዘቃተ ፡ በፍራንጋ ፡ ወረከቡ ፡ ማየ ፡ ሕያወ ፡ ወተጋአዙ ፡ ኖሎተ ፡ ጌራሮን ፡ ምስለ ፡ ኖሎተ ፡ ይስሐቅ ፡ እንዘ ፡ ይብሉ ፡ ዘዚአነ ፡ ዝማይ ።
20 ወከረዩ ፡ ዐዘቅተ ፡ ካልአ ፡ ወተበአሱ ፡ በእንቲአሁኒ ፡ ወጸውዐ ፡ ስሞ ፡ ጸባብ ፡ ወአንሥአ ፡ ወከረዩ ፡ ዐዘቅተ ፡ ካልአ ፡ ወኢተጋአዙ ፡ ወጸውዐ ፡ ስሞ ፡ ስፉሕ ፡ ወይቤ ፡ ይስሐቅ ፡ ይእዜ ፡ አስፍሐ ፡ ለነ ፡ እግዚአብሔር ፡ ወልህቅነ ፡ ዲበ ፡ ምድር ።
21 ወዐርገ ፡ እምህየ ፡ ውስተ ፡ ዐዘቅተ ፡ መሐላ ፡ በቀዳሚ ፡ ዓመት ፡ ዘሱባዔ ፡ ቀዳሚ ፡ በራብዕ ፡ ወአርብዓ ፡ ኢዮቤለው ፡ 22 ወአስተርአዮ ፡ እግዚአብሔር ፡ በይእቲ ፡ ሌሊት ፡ በሠርቀ ፡ ቀዳሚ ፡ ወርኅ ፡ ወይቤሎ ፡ አነ ፡ ውእቱ ፡ አምላከ ፡ አብርሃም ፡ አቡከ ፡ ኢትፍራህ ፡ እስመ ፡ አነ ፡ ምስሌከ ፡ ሀለውኩ ፡ ወእባርከከ ፡ ወአብዝኆ ፡ አበዝኅ ፡ ዘርአከ ፡ ከመ ፡ ኆፃ ፡ ምድር ፡ በእንተ ፡ አብርሃም ፡ ቍልዔየ ።
23 ወሐነጸ ፡ ህየ ፡ ምሥዋዕ ፡ ዘቀዳሚ ፡ ዘሐነጸ ፡ አብርሃም ፡ አቡሁ ።
24 ወከረዩ ፡ ዐዘቅተ ፡ ወረከቡ ፡ ማየ ፡ ሕያወ ፡ 25 ወደቀ ፡ ይስሐቅኒ ፡ ከረዩ ፡ ዐዘቅተ ፡ ካልአ ፡ ወኢረከቡ ፡ ማየ ።
26 ወጸውዐ ፡ ስሞ ፡ ለውእቱ ፡ መካን ፡ ዐዘቅተ ፡ መሐላ ፡ እስመ ፡ በህየ ፡ መሐለ ፡ ለአቤሜሌክ ፡ ወለአኮዘት ፡ ካልኡ ፡ ሎቱ ፡ ወለፊኮል ፡ ዐቃቢሁ ፡ 27 ወአእመረ ፡ ይስሐቅ ፡ በይእቲ ፡ ዕለት ፡ ከመ ፡ በግፉዕ ፡ መሐለ ፡ ሎሙ ፡ ለገቢር ፡ ምስሌሆሙ ፡ ሰላመ ።
28 ወረገሞሙ ፡ ይስሐቅ ፡ በይእቲ ፡ ዕለት ፡ ለፍልስጥኤም ፡ ወይቤ ፡ ርጉም ፡ ፍልስጥኤም ፡ ለዕለተ ፡ መዓት ፡ ወቍጥዓ ፡ እማእከለ ፡ ኵሉ ፡ አሕዛብ ።
29 ወዘአምሠጠ ፡ እምሰይፈ ፡ ፀር ፡ ወእምነ ፡ ኬጥኤም ፡ ይሠርዎሙ ፡ ሕዝብ ፡ ጻድቅ ፡ በኵነኔ ፡ እምታሕተ ፡ ሰማይ ፡ እስመ ፡ ፀረ ፡ ወጸላእተ ፡ ይከውኑ ፡ ለውሉድየ ፡ በመዋዕሊሆሙ ፡ በዲበ ፡ ምድር ፡ 30 ወአልቦ ፡ ተኀድጎ ፡ ሎሙ ፡ ተረፈ ፡ ወዘይድኅን ፡ አመ ፡ ዕለተ ፡ መዓተ ፡ ኵነኔ ።
31 እስመ ፡ እመኒ ፡ እስከ ፡ ሰማይ ፡ ዐርገ ፡ እምህየ ፡ ይወርድ ፡ ወእመኒ ፡ ጸንዐ ፡ ውስተ ፡ ምድር ፡ እምህየ ፡ ይትመላሕ ፡ ወእመኒ ፡ ተኀብአ ፡ ማእከለ ፡ አሕዛብ ፡ እምህየ ፡ ይሤሮ ፡ ወእመኒ ፡ ወረደ ፡ ውስተ ፡ ሲኦል ፡ በህየ ፡ ይበዝኅ ፡ ኵነኔሁ ።
32 ወእመኒ ፡ ሖረ ፡ ውስተ ፡ ፂዋዌ ፡ በእደ ፡ እለ ፡ የኀሥሥዋ ፡ ለነፍሱ ፡ በማእከለ ፡ ፍኖት ፡ ይቀትልዎ ፡ ወአልቦ ፡ አትርፎ ፡ ሎቱ ፡ ስመ ፡ ወዘርአ ፡ ውስተ ፡ ኵሉ ፡ ምድር ።
33 ወከመዝ ፡ ተጽሕፈ ፡ ወተቈርዐ ፡ በእንቲአሁ ፡ ውስተ ፡ ጽላተ ፡ ሰማይ ፡ ለገቢር ፡ ሎቱ ፡ በዕለተ ፡ ኵነኔ ፡ ከመ ፡ ይሠሮ ፡ እምድር ።