Hover a verse for quick parallels · click it for the full panel across Bibles & notes.
1 ወኢያረምም፡ በእንተ፡ ጽዮን፡ ወኢየኀድግ፡ በእንተ፡ ኢየሩሳሌም፣፡ እስከ፡ ትወፅእ፡ ጽድቅየ፡ ከመ፡ ብርሃን፡ ወተኀቱ፡ መድኃኒትየ፡ ከመ፡ ማኅቶት።
2 ወይሬእዩ፡ አሕዛብ፡ ጽድቀኪ፡ ወነገሥትኒ፡ ስብሐተኪ፡ ወይሰመይ፡ ስመኪ፡ ሐዲሰ፡ ዘእግዚአብሔር፡ ሰመየኪ።
3 ወትከውኒ፡ አክሊለ፡ ሠናየ፡ ውስተ፡ እደ፡ እግዚአብሔር፡ ወቀጸላ፡ መንግሥት፡ ውስተ፡ እደ፡ አምላክኪ።
4 ወኢትሰመዪ፡ እንከ፡ ኅድግተ፡ ወኢትሰመይ፡ እንከ፡ ምድርኪ፡ በድወ።
5 ወከመ፡ ይነብር፡ ወሬዛ፡ ምስለ፡ ድንግል፡ ከማሁ፡ ይነብሩ፡ ደቂቅኪ፤ ወከመ፡ ይትፌሣሕ፡ መርዓዊ፡ በመርዓቱ፡ ከማሁ፡ ይትፌሣሕ፡ እግዚአብሔር፡ ብኪ።
6 ወአነብር፡ ኢየሩሳሌም፡ መዓቅበ፡ ዲበ፡ አረፋትኪ፡ መዓልተ፡ ወሌሊተ፡ እለ፡ ኢያረምሙ፡ እንዘ፡ ይዜከርዎ፡ ለእግዚአብሔር።
7 ኢታርምሙ፡ ሎቱ፡ እስከ፡ ይሠርዕ፡ ወእስከ፡ ይሬሲ፡ ትፍሥሕተ፡ ለኢየሩሳሌም፡ በዲበ፡ ምድር።
8 መሐለ፡ እግዚአብሔር፡ በስብሐቲሁ፡ ወበኃይለ፡ መንግሥቱ፡ ከመ፡ ኢይሁብ፡ እንከ፡ እክለኪ፡ ወስርነናየኪ፡ ለፀር፣፡ ወአኢይሰትይዎ፡ እንከ፡ ፀር፡ ለዓለም፡ ለወይንኪ፡ ዘተገበርኪ።
9 ዳእሙ፡ ዘአስተጋብኦ፡ ይበልዖ፡ ወይሴብሖ፡ ለእግዚአብሔር፣፡ ወእለ፡ አስተጋብእዎ፡ ይሰትይዎ፡ በአህጉርየ፡ ቅዱሳት።
10 ሖሩ፡ ባኡ፡ እንተ፡ አንቀጽየ፡ ወጺሑ፡ ፍኖተ፡ ለሕዝብየ፤ ወአእትቱ፡ እብነ፡ እምፍኖት፡ ወንሥኡ፡ ትእምርተ፡ ለአሕዛብ።
11 ናሁ፡ እግዚአብሔር፡ ይገብር፡ መንክረ፡ እስከ፡ አጽናፈ፡ ምድር።
12 ወትሰመዩ፡ ሕዝበ፡ ቅዱሰ፡ ዘአድኀነ፡ እግዚአብሔር፤ አንቲኒ፡ ትሰመዪ፡ ቅድስተ፡ ሀገረ፡ እንተ፡ ይፈቅድዋ፡ ወአኮ፡ እንተ፡ የኀድግዋ።