Hover a verse for quick parallels · click it for the full panel across Bibles & notes.
1 ርኢክሙሂ፡ ከመ፡ ተሐጕለት፡ ጽድቅ፡ ወኢሐለይክሙ፡ በልብክሙ፤ ወአእትቱ፡ ዕደወ፡ ጻድቃነ፡ ወአልቦ፡ ዘአእመረ፣፡ እስመ፡ እምገጸ፡ ዓመፃ፡ ተአተተ፡ ጻድቅ።
2 ይከውን፡ መቅበርቱ፡ በሰላም፡ እስመ፡ ይነሥእዎ፡ እማእከል።
3 አንትሙሰ፡ ንዑ፡ ዝየ፡ ደቂቀ፡ ኃጥኣን፡ ወዘርአ፡ ዘማውያን፡ ወዘማውያት።
4 ላዕለ፡ መኑ፡ ተፈጋዕክሙ፤ ወላዕለ፡ መኑ፡ አብቀውክሙ፡ አፉክሙ፡ ወላዕለ፡ መኑ፡ አንዋኅክሙ፡ ልሳነክሙ፤ አኮኑ፡ አንትሙ፡ እሙንቱ፡ ውሉደ፡ ሕርቱማን፡ ወዘርአ፡ ዓማፅያን።
5 እለ፡ ትትፌሥሑ፡ በጣዖት፡ ወትሠውዑ፡ በታሕተ፡ ዖመ፡ ቈጽል፣፡ ወትዘብሑ፡ ውሉደክሙ፡ ውስተ፡ ቈላት፡ ማእከለ፡ ጾላዓት።
6 ዝንቱ፡ ውእቱ፡ መክፈልትኪ፡ ወዝንቱ፡ ርስትኪሂ፡ እለ፡ ሎሙ፡ አውጻሕኪ፡ ሞጻሕተኪ፡ ወእለ፡ ሎሙ፡ አዕረጊ፡ መሥዋዕተኪ።
7 ውስተ፡ ደብር፡ ዓቢይ፡ ወነዋኅ፡ ህየ፡ ነጸፍኪ፡ ምስካበኪ፡ ወበህየ፡ አዕረጊ፡ መሥዋዕተኪ።
8 ወሠራዕኪ፡ ድኅረ፡ ማዕጾ፡ ጸብአተኪ።
9 ወአብዛኅኪ፡ ምስሌሆሙ፡ ዝሙተኪ፡ ወተማሐዝኪ፡ ብዙኃነ፡ እለ፡ ርኁቃን፡ እምኔኪ፤ ወፈነውኪ፡ ተናብልተ፡ ወአስተጓሕለውኪ፡ ምስሌሆሙ፡ ወተኀሥሪ፡ እስከ፡ ሲኦል።
10 ሰራሕኪ፡ በዐዊድ፡ ወዓዲ፡ ኢትቤሊ፤ አኀድግ፡ እንከሰ፡ እንዘ፡ ብየ፡ ኃይለ፡ እስመ፡ ዘንተ፡ ገበርኪ፡ ወኢኀፈርክኒ።
11 መነ፡ ተሐዘብኪ፡ ወፈራህኪ፤ ወሐሰውክኒ፡ ወኢተዘከርክኒ፡ ወኢሐለይክኒ፡ በልብኪ፤ ወአነሂ፡ ተሀየይኩኪ፡ እስመ፡ ኢፈራህክኒ።
12 እንከሰ፡ እወቅሥ፡ ዘዚአየሂ፡ ጽድቅየ፡ ወዘዚአኪኒ፡ ጌጋየኪ፡ ዘኢይበቍዐኪ።
13 እስኩኬ፡ ያድኅኑኪ፡ እምከመ፡ አውየውኪ፡ አመ፡ ተመንደብኪ፤ ናሁ፡ ይነሥኦሙ፡ ዐውሎ፡ ለኵሎሙ፡ ወየሐፍሦሙ፡ ነፋስ።
14 ወይብል፤ ጺሑ፡ ፍኖተ፡ ቅድመ፡ ገጹ፡ ወአእትቱ፡ እብነ፡ እምፍኖተ፡ ሕዝብየ።
15 ከመዝ፡ ይቤ፡ ልዑል፡ ዘየኀድር፡ ውስተ፡ አርያም፡ ለዓለም፣፡ ቅዱሰ፡ ቅዱሳን፡ ስሙ፣፡ እግዚአብሔር፡ ዘየዐርፍ፡ ውስተ፡ ቅዱሳን፡ ወይሁቦሙ፡ ትዕግሥተ፡ ለዕንቡዛን፡ ወያስተፌሥሖሙ፡ ለቍስላነ፡ ልብ።
16 ወአኮ፡ ለዓለም፡ ዘእቀሥፈክሙ፡ ወአኮ፡ ዘልፈ፡ ዘእትመዐዓክሙ፤ እስመ፡ እምኀቤየ፡ ይወፅእ፡ መንፈስ፡ ወአነ፡ ፈጠርኩ፡ መንፈሰ፡ ኵሉ።
17 ወበእንተ፡ ኅዳጥ፡ ኃጢአት፡ አሕመምክዎ፡ ወቀሠፍክዎ፣፡ ወሜጥኩ፡ ገጽየ፡ እምኔሁ፡ ወተከዘ፡ ወሖረ፡ ትኩዙ።
18 ወእምዝ፡ ርኢኩ፡ ፍናዊሁ፡ ወፈወስክዎ፡ ወአስተፈሣሕክዎ፡ ወወሀብክዎ፡ ፍሥሐ፡ ጽድቅ።
19 ወሰላመ፡ በዲበ፡ ሰላም፡ ለርኁቃን፡ ወለቅሩባን፡ ይቤ፡ እግዚአብሔር፤ እሠሀሎሙ።
20 ወኃጥኣንሰ፡ ከመዝ፡ ይትገፈትዑ፡ ወኢይረክቡ፡ ዕረፍተ።
21 ወአልቦሙ፡ ፍሥሐ፡ ለኃጥኣን፡ ይቤ፡ እግዚአብሔር።