Hover a verse for quick parallels · click it for the full panel across Bibles & notes.
1 ወይእዜኒ፡ ስማዕ፡ ያዕቆብ፡ ቍልዔየ፤ ወእስራኤል፡ ዘኀረይኩከ።
2 ከመዝ፡ ይቤ፡ እግዚአብሔር፡ አምላክ፡ ዘፈጠረከ፤ በውስተ፡ ከርሥ፡ ዓዲ፡ እረድአከ፤ ኢትፍራህ፡ ያዕቆብ፡ ቍልዔየ፤ ወእስራኤል፡ ፍቁርየ፡ ዘኀረይኩ።
3 እስመ፡ አነ፡ እሁብ፡ ማየ፡ በውስተ፡ ጽምእ፤ ለእለ፡ የሐውሩ፡ በውስተ፡ በድው፤ ወእሠይም፡ መንፈስየ፡ ዲበ፡ ዘርእከ፤ ወበረከትየ፡ ላዕለ፡ ውሉድከ።
4 ወይበቍሉ፡ ከመ፡ ሣዕር፡ ማእከለ፡ ማይ፤ ወከመ፡ ኵሐ፡ ዘኀበ፡ ሙኀዘ፡ ማይ።
5 ወዝኒ፡ ይብል፤ ዘእግዚአብሔር፡ አነ፤ ወዝንቱኬ፡ ይኬልሕ፡ በስመ፡ ያዕቆብ፤ ወካልእ፡ ይጽሕፍ፡ በእዴሁ፤ ዘእግዚአብሔር፡ ውእቱ፤ ወበስመ፡ እስራኤል፡ ይጼውእ።
6 ከመዝ፡ ይቤ፡ እግዚአብሔር፡ ንጉሠ፡ እስራኤል፡ ወዘአድኀኖ፡ አምላክ፡ ጸባኦት፤ አነ፡ ቀዳማዊ፡ ወአነ፡ ደኃራዊ፤ ወአልቦ፡ ባዕድ፡ አምላክ፡ ዘእንበሌየ፡ ማሕየዊ።
7 ወመኑ፡ መድኅን፡ ከማየ፤ ይቁም፡ ወይጸውዕ፡ ወይንግር፡ ወያስተዳሉ፡ ሊተ፡ ዘእምአመ፡ ፈጠርክዎ፡ ለሰብእ፡ እስከ፡ ለዓለም፡ ወይንግርክሙ፡ ዘይመጽእ፡ ዘእንበለ፡ ይብጻሕ።
8 ኢትክብቱ።
9 ወኢሀለዉ፡ አሜሃ፡ እለ፡ ይፈጥሩ፡ ወይገልፉ፣፡ ወኵሎሙ፡ ከንቱ፡ እለ፡ ይገብሩ፡ ፍትወተ፡ ነፍሶሙ፡ በከ፡ ዘኢይበቍዖሙ፤ ወይትኀፈሩ፡ ኵሎሙ።
10 እለ፡ ይገብሩ፡ አማልክተ፡ ወይገልፉ፡ ዘኢይበቍዕዎሙ።
11 ወኵሎሙ፡ በኀበ፡ ተገብሩ፡ ይየብሱ።
12 እስመ፡ አብልኀ፡ ጸራቢ፡ ኀፂነ፡ ምሣሮ፡ ወገብሮሙ፣፡ ወበመድቅሑ፡ ደቅሖሙ፡ ወበኃይለ፡ መዝራዕቱ፡ ጸንዖሙ፤ ይርኅብኒ፡ ወይደክም፡ ወይጸምእኒ።
13 ወኀሪዩ፡ ጸራቢ፡ ዕፀ፡ ያቀውም፡ በአምጣኑ፡ ወያስተጣግዕ፡ በኵሉ፣፡ ወይገብሮ፡ በአምሳለ፡ ሰብእ፡ ወከመ፡ ራእየ፡ እጓለ፡ እመሕያው፡ ወያቀውሞ፡ ውስተ፡ ቤት።
14 ለዝኩ፡ ዕፅ፡ ዘገዘሞ፡ እምገዳም፡ ዘእግዚአብሔር፡ አብቈለ፡ ወበዝናም፡ አልሀቀ።
15 ዘያነድድ፡ ሰብእ፡ ወያነሥእ፡ እምኔሁ፡ ወይስኅን፡ ወያነድድ፡ ወያበስል፡ ቦቱ፡ ኅብስተ፤ ወዘተርፈ፡ እምኔሁ፡ ይገብር፡ ሎቱ፡ አማልክተ፡ ወይሰግዱ፡ ሎቱ፡ ለዝኩ።
16 ዘመንፈቆ፡ አንደደ፡ በእሳት፡ ወበመንፈቁ፡ ጠበሰ፡ ሥጋ፡ ወበልዐ፡ ጠቢሶ፡ ጥብስ፡ ወጸግበ፡ ወተማወቀ፡ ወይቤ፤ ሐወዘኒ፡ እስመ፡ ሞቁ፡ ወርኢኩ፡ እሳቶ።
17 ወዘተርፈ፡ ይገብር፡ ሎቱ፡ አማልክተ፡ ዘግልፎ፡ ወያስተባርክ፡ ወይሰግድ፡ ሎቱ፡ ወይጼሊ፡ ኀቤሁ፡ ወይብሎ፤ አድኅነኒ፡ እስመ፡ አምላኪየ፡ አንተ።
18 ኢየአምሩ፡ ወኢይሔልዩ፡ ወተጸለለ፡ አዕይንቲሆሙ፡ ወኢይሬእዩ፡ ወኢይሔልዩ፡ በልቦሙ።
19 ወኢይትሐዘቡ፡ በነፍሶሙ፡ ወኢየአምሩ፡ በምክሮሙ፡ ከመ፡ መንፈቆ፡ አንደዱ፡ በእሳት፡ ወአብሰሉ፡ ኅብስተ፡ ወበመንገቁ፡ ጠበሱ፡ ሥጋ፡ ወበልዑ፣፡ ወዘተርፈ፡ ገብሩ፡ ሎሙ፡ ርኩሰ፡ ወሰገዱ፡ ሎቱ።
20 አእምሩ፡ እንከ፡ ከመ፡ ሐመድ፡ ልቦሙ፡ ወይጌግዩ፡ ወአልቦ፡ ዘይክል፡ አድኅኖ፡ ነፍሱ፡ እምኔሆሙ።
21 ተዘከር፡ ዘንተ፡ ያዕቆብ፡ ወእስራኤልኒ፡ ቍልዔየ፡ አንተ፤ አነ፡ ፈጠርኩከ፡ ገብርየ፡ አንተ፡ እስራኤል፣፡ ኢትርስዐኒ።
22 ናሁ፡ ደምሰስክዎን፡ ከመ፡ ደመና፡ ለኃጣውኢከ፡ ወከመ፡ ቆባር፡ ለጌጋይከ፤ ተመየጥ፡ ኀቤየ፡ ወአድኅነከ።
23 ለይትፈሥሑ፡ ሰማያት፡ እስመ፡ ተሠሀሎሙ፡ እግዚአብሔር፡ ለእስራኤል፤ ወይንፍኁ፡ ቀርነ፡ መሠረታት፡ ምድር፡ ወይወዉዑ፡ አድባር፡ በፍሥሐ፡ ወአውግርኒ፡ ወኵሉ፡ ዕፀወ፡ ገዳም፡ ዘውስቴቶሙ፣፡ እስመ፡ አድኀኖ፡ እግዚአብሔር፡ ለያዕቆብ፡ ወእስራኤል፡ ተሰብሐ።
24 ከመዝ፡ ይቤ፡ እግዚአብሔር፡ ዘአድኀነከ፡ ወዘፈጠረከ፡ በውስተ፡ ከርሥ፤ አነ፡ እግዚአብሔር፡ ዘገበርኩ፡ ኵሎ፡ ባሕቲትየ፣፡ አነ፡ ሰፋሕክዎ፡ ለሰማይ፡ ወአጽናዕክዋ፡ ለምድር።
25 መኑ፡ ባዕድ፡ ዘይመይጥ፡ ምክሮሙ፡ ለእለ፡ ያነቅሑ፡ በፃውዕ፡ ወለእለ፡ ያሰግሉ፡ እምልቦሙ፤ ያገብኦሙ፡ ድኅሬሆሙ፡ ለጠቢባን፡ ወያለስሕ፡ ምክሮሙ።
26 ወያቀውም፡ ቃለ፡ ገብሩ፡ ወያጸድቅ፡ ምክረ፡ መላእክቲሁ፤ ወይብላ፡ ለኢየሩሳሌም፤ ትነብሪ፣፡ ወለአህጉረ፡ ይሁዳ፤ ትትሐነጹ፡ ወይበቍሉ፡ ገዳማቲሃ።
27 ዘይብላ፡ ለቀላይ፤ ይበሲ፡ ወይንፅፋ፡ አፍላጋትኪ።
28 ዘይብሎ፡ ለቂሮስ፤ ጥበብ፡ ወሐሊ፡ ወግበር፡ ኵሎ፡ ፈቃድየ፤ ዘይብላ፡ ለኢየሩሳሌም፤ ትትሐነጺ፡ ወእሣርራ፡ ለቤተ፡ መቅደስየ።