1 አሌ፡ ሎሙ፡ ለእለ፡ ያኀሥሩክሙ፣፡ ወለክሙሰ፡ አልቦ፡ ዘያኀሥረክሙ፤ ዘሂ፡ ለክሙ፡ ዐለወ፡ አኮ፡ ኪያክሙ፡ ዘዐለወ።
2 እግዚኦ፡ ተሠሀለነ፡ እስመ፡ ኪያከ፡ ተወከልነ።
3 ወእምግርማ፡ ቃሉ፡ ደንገፁ፡ አሕዛብ፡ በፈሪሆትከ፡ ወተዘርዉ፡ አሕዛብ።
4 ወይእዜኒ፡ ናሁ፡ ይትጋብኡ፡ ምህርካክሙ፡ ንኡሱ፡ ወዓቢዩ፤ ከመ፡ ዘያስተጋብእ፡ አንበጣ፡ ከማሁ፡ ይትዌነይ፡ ብክሙ።
5 ቅዱስ፡ እግዚአብሔር፡ ዘየኀድር፡ ውስተ፡ አርያም፡ ወመልአት፡ ጽዮን፡ ጽድቀ፡ ወርትዐ።
6 ወያገብእዎሙ፡ በሕግ፡ ውስተ፡ መዛግብተ፡ መድኃኒትነ።
7 ናሁ፡ በግርማክሙ፡ ፈርሁክሙ፡ እለ፡ ቀዲሙ፡ ትፈርህዎሙ፡ አንትሙ፡ ወይርዕዱ፡ እምኔክሙ፤ ወይትፌነዉ፡ ሐዋርያት፡ እንዘ፡ መሪረ፡ ይበክዩ፡ ወይስእሉ፡ ሰላመ።
8 እስመ፡ ማሰነ፡ ፍኖቶሙ፡ ወኀለፈ፡ ግርማሆሙ፡ ለአሕዛብ፡ ወተሥዕረ፡ ኪዳኖሙ፡ ወኢትረስይዎሙ፡ ከመ፡ ዕደው።
9 ላሐወት፡ ምድር፡ ወተኀፍረ፡ ሊባኖስ፣፡ ዖመ፡ ኮነ፡ ሳሮን።
10 ናሁ፡ ይእዜ፡ እትነሣእ፡ ይቤ፡ እግዚአብሔር፣፡ ይእዜ፡ እሴባሕ፡ ወይእዜ፡ እትሌዐል፡ አነ።
11 ይእዜ፡ ትሬእዩ፡ ወይእዜ፡ ታነክሩ፤ ይከውን፡ ከንቶ፡ ኃይለ፡ መነፈስክሙ፡ ወእሳት፡ ትበልዐክሙ።
12 ወይከውኑ፡ አሕዛብ፡ ከመ፡ ዋዕየ፡ ሦክ፡ ዘገዳም፡ ውዑያነ፡ ወግዱፋነ።
13 ወይሰምዑ፡ ዘገበርኩ፡ እለሂ፡ እምርኁቅ፣፡ ወእለሂ፡ እምቅሩብ፡ የአምሩ፡ ኃይልየ።
14 ዐለዉኒ፡ እለ፡ ውስተ፡ ጽዮን፡ ወዐመፁኒ፤ ናሁ፡ ይእኅዞሙ፡ ረዓድ፡ ለኃጥኣን።
15 ዘየሐውር፡ በጽድቅ፡ ወዘይነብብ፡ ርቱዐ፣፡ ዘይጸልእ፡ ፍኖተ፡ ዓመፃ፣፡ ዘይጸልእ፡ ኃጢአተ፡ ወጽልሑተ፡ ወዘይመይጥ፡ እዴሁ፡ እምሕልያን፤ ዘይመይጥ፡ እዝኖ፡ ከመ፡ ኢይስማዕ፡ ኵነኔ፡ ነፍስ፡ ወይከድን፡ ዐይኖ፡ ከመ፡ ኢይርአይ፡ ግፍዓ።
16 ዘከመዝኬ፡ ይነብር፡ ውስተ፡ ልዑል፡ በአተ፡ ኰኵሕ፡ ጽኑዕ፤ ወይትወሀቦ፡ እክልሂ፡ ወማይሂ፡ በጽድቅ።
17 ወትሬእይዎ፡ ለንጉሥ፡ ምስለ፡ ስብሐት፡ ወይሬእያ፡ አዕይንቲክሙ፡ ምድረ፡ ርኁቀ።
18 ወትትሐዘብ፡ ነፍስክሙ፡ ፍርሃተ።
19 ንኡሱ፡ ወዓቢዩ፡ ሕዝብ፡ እለ፡ ኢመከሩ፡ ወእለ፡ ኢያእመሩ፡ ነገረ፡ ዕሙቀ፡ ከመ፡ ኢይስምዑ፡ ሕዝብ፡ ዓማፅያን፣፡ ወዘኒ፡ ይሰምዕ፡ ከመ፡ ዘአልቦ፡ ልበ።
20 ናሁ፡ ጽዮን፡ ሀገረ፡ መድኃኒትነ፣፡ ወትሬእዪ፡ በአዕይንትኪ፡ ኢየሩሳሌም፡ ሀገር፡ ብዕልት፤ ወአብያቲሃኒ፡ ዘኢያንቀለቅል፡ ወዘኢይትሐወስ፡ መታክለ፡ ደብተራሃ፡ ለመዋዕለ፡ ዓለም፡ ወአሕባሊሃኒ፡ ዘኢይትበተክ።
21 እስመ፡ ስመ፡ እግዚአብሔር፡ ዓቢይ፡ ለክሙ፤ ወይከውን፡ ለብሔርክሙ፡ አፍላግ፡ ወሙኃዘ፡ ማይ፡ ርሒብ፡ ወስፉሕ፡ ኢተሐውር፡ እንከ፡ ዘንተ፡ ፍኖተ፣፡ አሕማርኒ፡ ኢየሐውራ።
22 እስመ፡ ዓቢይ፡ ውእቱ፡ አምላኪየ፡ እግዚአብሔር፤ ወኢይትሄየየኒ፡ እግዚአብሔር፡ መኰንንነ፡ ወእግዚአብሔር፡ አምላክነ፡ ወእግዚአብሔር፡ ንጉሥነ፤ ውእቱ፡ እግዚአብሔር፡ ያድኅነነ።
23 ተበትከ፡ አሕባልኪ፡ እስመ፡ ኢረትዐ፤ ዓምድኪ፡ ጸነት፡ ወኢበጽሐ፡ ሠርዌኪ፤ ኢያነሥእ፡ ትእምርተ፡ እስከ፡ ይእኀዝዎ፡ ወይመሀርክዎ።
24 ወኢይብል፡ ደከምኩ፡ ሕዝብ፡ ዘይነብር፡ ውስቴቶሙ፤ እስመ፡ ይትኀደግ፡ ሎሙ፡ ኃጣውኢሆሙ።