1 አሌ፡ ሎሙ፡ ለውሉደ፡ ዓላውያን፣፡ ከመዝ፡ ይቤ፡ እግዚአብሔር፤ ገበርክሙአ፡ ምክረ፡ ወአኮ፡ በእንቲአየ፣፡ ወሠራዕክሙ፡ አኮ፡ በእንተ፡ መንፈስየ፡ ከመ፡ ትወስኩ፡ ኃጢአተ፡ በዲበ፡ ኃጢአት።
2 እለ፡ ተሐውሩ፡ ወትወርዱ፡ ብሔረ፡ ግብጽ፡ ወኢሰአሉኒ፡ እርድኦሙ፡ እምግብጽ፡ ወእምፈርዖን።
3 ወይከውነክሙ፡ ፈርዖን፡ ወልታ፡ ኃሣር፡ ወለእለ፡ ተወከልክሙ፡ በግብጽ፡ ይከውኑ፡ ጽዕለተ።
4 መላእክተ፡ ኤንጣን፡ ሐዋርያት፡ እኩያን።
5 ወከንቶ፡ ይፃምዉ፡ ኀበ፡ አሕዛብ፡ እለ፡ ኢይበቍዕዎሙ፡ ለረድኤት፡ ዘእንበለ፡ ለኃሣር፡ ወለጽዕለት።
6 በሕማም፡ ወበምንዳቤ፡ አንበሳ፡ ወእጓለ፡ አንበሳ፣፡ ወእምህየ፡ አራዊተ፡ ምድር፡ ዘይሰርር፡ እለ፡ ይፄዕኑ፡ በአግማል፡ ወበአእዱግ፡ ብዕሎሙ፡ ወይወስዱ፡ ኀበ፡ አሕዛብ፡ ዘኢይበቍዕዎሙ፡ ለረድኤት፡ ዘእንበለ፡ ለኃሣር፡ ወለጽዕለት።
7 ከንቶኬ፡ ግብጽ፡ ኢይበቍዑክሙ፤ ንግሮሙ፡ ከመ፡ ከንቱ፡ ዘተማዐዱ።
8 ወይእዜኒ፡ ንበር፡ ወጸሐፎ፡ ለዝንቱ፡ ውስተ፡ ሰሌዳ፡ ወይከውን፡ በመዋዕለ፡ ዕድሜሁ፡ ወአስከ፡ ለዓለም።
9 እስመ፡ ሕዝብ፡ ዓላውያን፡ እሙንቱ፣፡ ውሉደ፡ ሐሰት፡ እለ፡ አበዩ፡ ሰሚዐ፡ ሕገ፡ እግዚአብሔር።
10 እለ፡ ይብልዎሙ፡ ለነቢያት፡ ኢትዜንዉነ፣፡ ወለእለሂ፡ ይሬእዩ፡ ራእየ፤ ኢትንግሩነ፣፡ ወመሰ፡ ትነግሩነ፡ ካልእተ፡ ጌጋየ፡ አይድዑነ።
11 ወሚጡነ፡ እምዛቲ፡ ፍኖት፤ ወአኅድጉነ፡ ዘንተ፡ አሠረ፡ ወሠዐሩ፡ እምኔነ፡ ትምህርተ፡ እስራኤል።
12 በእንተ፡ ዝንቱ፡ ከመዝ፡ ይቤ፡ ቅዱሰ፡ እስራኤል፤ እስመ፡ ክሕድክምዎ፡ ለዝንቱ፡ ነገር፡ ወተወከልክሙ፡ በሐሰት፡ ወአንጐርጐርክሙ፡ ወተአመንክሙ፡ በዝንቱ፡ ነገር።
13 እንከ፡ በእንተ፡ ዝንቱ፡ ትከውነክሙ፡ ዛቲ፡ ኃጢአትክሙ፡ ከመ፡ አረፍት፡ ውድቅት፡ እንተ፡ በጊዜሃ፡ ሀገር፡ ጽንዕት፡ ወወድቀት፡ ግብተ።
14 ወድቀታሂ፡ ከመ፡ ቅጥቃጤ፡ ጻሕበ፡ ልሕኵት፡ ወይከውኑ፡ ድቁቀ፡ አግልዕተ፡ ወኢይረክቡ፡ በውስቴቱ፡ ገልዓ፡ በዘይወስዱ፡ እሳተ፡ ወኢበዘያወክፉ፡ ማየ፡ ኅዳጠ።
15 ከመዝ፡ ይቤ፡ እግዚአብሔር፡ ቅዱሰ፡ እስራኤል፤ እምከመአ፡ ነሳሕከ፡ ወበከይከ፣፡ ተሐዩ፡ ወተአምር፡ ኀበ፡ ሀለውከ፤ እስመ፡ ተወከልከ፡ በከንቱ፡ ወከንቶ፡ ይከውነክሙ፡ ኃይልክሙ።
16 ወትቤሉ፤ በአፍራሲነ፡ ናመሥጥ፡ ወበእንተ፡ ዝንቱ፡ ትጐይዩ፡ ወትብሉ፤ ንፄዐን፡ ረዋጼ፡ ፈረሰ፤ በእንተ፡ ዝንቱኬ፡ ረዋጽያን፡ እሙንቱ፡ እለ፡ ይዴግኑክሙ።
17 ይሜምዑ፡ ፲፻፡ እምድምፀ፡ ፩ወእምቃለ፭፡ ይጐይዩ፡ ብዙኃን፡ እስከ፡ ትተርፉ፡ ከመ፡ ሐሠር፡ ውዑይ።
18 ወካዕበ፡ ይሣሀለክሙ፡ እግዚአብሔር፣፡ ወበእንተ፡ ዝንቱ፡ ተለዐለ፡ ከመ፡ ይምሐርክሙ፡ እስመ፡ እግዚአብሔር፡ አምላክነ፡ መኰንን፡ ውእቱ።
19 እስመ፡ ሕዝብ፡ ቅዱስ፡ የኀድር፡ ውስተ፡ ኢየሩሳሌም፡ በጽዮን።
20 ወይሁበክሙ፡ እግዚአብሔር፡ ሲሳየክሙ፡ በሕማም፡ ወማየክሙሂ፡ በምንዳቤ፣፡ ወኢይቀርብ፡ እንከ፡ ዘያስሕተክሙ፤ ወይሬእያ፡ አዕይንቲከ፡ ላዕለ፡ እለ፡ አስሐቱከ።
21 ወይስምዓ፡ እዘኒከ፡ ድምፆሙ፡ ለእለ፡ ስሕቱ፡ በድኅሬከ፣፡ እለ፡ ይብሉ፤ ንሖር፡ በዛቲ፡ ፍኖት፡ እመሂ፡ ለየማን፡ ወእመሂ፡ ለፀጋም።
22 ወምዕረኒ፡ መንገለ፡ ጣዖት፡ እለ፡ ቅፉላን፡ በብሩር፡ ወሥርግዋን፡ በወርቅ፤ ወትገብር፡ ደቃቀ፡ ወደመቀ፡ ወትክዕዎ፡ ከመ፡ ማይ፡ እንተ፡ ትነብር፡ ትክት፡ ወከመ፡ እዳዋት፡ ትገድፉ፡ ውስቴቶን።
23 ውእተ፡ አሚረ፡ ይዘንም፡ ለዘርአ፡ ምድርከ፡ ወይከውን፡ ጽጋብ፡ ለማእረረ፡ እክለ፡ ምድርከ፡ ወይሰብሕ፡ መራዕይከ፡ ወይትረዐይ፡ ብሔረ፡ ርሒበ፡ ወሥዑረ።
24 ወይቀምሑ፡ ብዕራይክሙ፡ ወአሥዋሪክሙ፡ እለ፡ ይትጌበርዋ፡ ለምድር፡ ሐሠረ፡ ዘተሖሰ፡ ምስለ፡ ሰገም።
25 ወይከውን፡ ዲበ፡ ኵሉ፡ አድባር፡ ነዋኃት፡ ወውስተ፡ ኵሉ፡ አውግር፡ ልዑል፡ ይውኅዝ፡ ማይ፡ ውእተ፡ አሚረ፣፡ አመ፡ ኀልቁ፡ ብዙኃን፡ ወአመ፡ ወድቀ፡ ማኅፈድ።
26 ወይከውን፡ ብርሃነ፡ ወርኅ፡ ከመ፡ ብርሃነ፡ ፀሐይ፣፡ ወይከውን፡ ብርሃነ፡ ፀሐይ፡ ምስብዒተ፡ ውእተ፡ አሚረ፣፡ አመ፡ ፈወሰ፡ እግዚአብሔር፡ ቍስለ፡ ሕዝቡ፡ ወይፌስስ፡ ሕማመ፡ መቅሠፍትከ።
27 ናሁ፡ ይመጽእ፡ ስመ፡ እግዚአብሔር፡ በጕንዱይ፡ መዋዕል፡ ወይነድድ፡ መዐቱ፤ ምስለ፡ ስብሐተ፡ ቃለ፡ ከናፍሪሁ፡ ወምሉእ፡ ቃለ፡ መዐቱ፡ ወትበልዕ፡ ከመ፡ እሳት፡ መቅሠፍተ፡ መዐቱ።
28 ወትውኅዝ፡ መንፈሱ፡ ከመ፡ ማይ፡ ውስተ፡ ሙራድ፡ ዘይበጽሕ፡ እስከ፡ ክሳድ፤ ይትናፈቅ፡ ከመ፡ ይሁኮሙ፡ ለአሕዛብ፡ ወያስሕቶሙ፡ ውስተ፡ ከንቱ፡ ወይዴግኖሙ፡ ጌጋይ፡ ወይእኅዞሙ፡ ወይትቤቀሎሙ፡ ውስተ፡ ገጾሙ።
29 ወትረኑ፡ ትትፌሥሑ፡ ወትበውኡ፡ ውስተ፡ መቅደስየ፡ እንዘ፡ ዘልፈ፡ ትገብሩ፡ በዓለ፣፡ ወከመ፡ ፍሡሓን፡ ትበውኡ፡ በዕንዚራ፡ ውስተ፡ ደብረ፡ እግዚአብሔር፡ ቅዱሰ፡ እስራኤል።
30 ወያሰምዕ፡ እግዚአብሔር፡ ቃለ፡ ስብሐቲሁ፡ ወያርኢ፡ መዐተ፡ መዝራዕቱ፡ ወመቅሠፍተ፡ መዐቱ፤ ወያነድድ፡ በእሳት፡ በላዒ፡ ወበኃይለ፡ ፀዓዕ፡ ከመ፡ ዝናም፡ ኃያል፡ ወበረድ፡ ዓበይት፡ ዘይወርድ።
31 በቃለ፡ እግዚአብሔር፡ ይትመውኡ፡ ፋርስ፡ በመቅሠፍት፡ ዘይቀሥፎሙ።
32 ወየዐግትዎ፡ እለ፡ ተሰፈወ፡ ከመ፡ ይርድእዎ፡ ወእለ፡ ኪያሆሙ፡ ተአመነ።
33 እስመ፡ ኢኮነ፡ እለ፡ እምቀዲሙ፡ ይትሐዘቦሙ።