1 ናሁ፡ እግዚአብሔር፡ ያማስና፡ ለዓለም፡ ወያመዘብራ፡ ወይቀፍጻ፡ ገጻ፣፡ ወይዘርዎሙ፡ ለእለ፡ ይነብሩ፡ ውስቴታ።
2 ወይከውን፡ ሕዝብ፡ ከመ፡ ካህን፣፡ ወገብር፡ ከመ፡ እግዚኡ፣፡ ወአመት፡ ከመ፡ እግዝእታ፤ ወዘይሣየጥ፡ ከመ፡ ዘይሠይት፣፡ ወዘይትሌቃሕ፡ ከመ፡ ዘይሌቅሕ፣፡ ወዘይፈዲ፡ ከመ፡ ዘበዓለ፡ ዕዳ።
3 ናሁ፡ ማስኖ፡ ትማስን፡ ምድር፡ ወበርብሮ፡ ትትበረብር፡ ምድር፡ እስመ፡ አፉሁ፡ ለእግዚአብሔር፡ ነበበ፡ ከመዝ።
4 ላሐወት፡ ምድር፡ ወማሰነት፡ ወተገፍትዐት፡ ዓለም፤ ላሕዉ፡ ዓበይተ፡ ምድር።
5 እስመ፡ አበሰት፡ ምድር፡ ምስለ፡ እለ፡ ይነብሩ፡ ውስቴታ፤ እስመ፡ ዐለዉ፡ ሕገ፡ ወወለጡ፡ ሥርዓተ፡ ወክሕዱ፡ ኪዳነ፡ ዘለዓለም።
6 በእንተ፡ ዝንቱ፡ እንጋ፡ ትውሕጦሙ፡ ምድር፡ እስመ፡ አበሱ፡ እለ፡ ይነብሩ፡ ውስቴታ።
7 ለይላሕዉ፡ ወይን፡ ወዓፀደ፡ ወይን፡ ወይበክዩ፡ ኵሎሙ፡ እለ፡ ይትፌሥሑ፡ በነፍሶሙ።
8 ኀልቀት፡ ትፍሥሕተ፡ ክብሮሙ፣፡ ኀልቀ፡ ትዝኅርት፡ ወብዕለ፡ ኃጥኣን፣፡ ኀልቀ፡ ቃለ፡ መሰንቆ።
9 ወተኀፍሩ፡ ወኢይሰትዩ፡ ወይነ፤ መሪረ፡ ኮነ፡ ሜስ፡ ለእለ፡ ይሰትይዎ።
10 ወመዝበራ፡ ኵሎን፡ አህጉር፡ ወተዐጽዋ፡ አብያት፡ ከመ፡ ኢይባኡ፡ ውስቴቶን።
11 ብክዩ፡ በእንተ፡ ወይን፡ እስመ፡ ተሥዕረ፡ ኵሉ፡ ትፍሥሕተ፡ ምድር።
12 ወይትኀደጋ፡ አህጉር፡ መዝበረ፣፡ ወአብያትኒ፡ የዐርቃ፡ ወይትኀደጋ፡ ወይትሐጐላ።
13 ዝንቱ፡ ኵሉ፡ ዘይከውን፡ ውስተ፡ ብሔር፡ ማእከለ፡ አሕዛብ።
14 ወእለሰ፡ ተርፉ፡ ውስተ፡ ምድር፡ ይትፌሥሑ፡ ኅቡረ፡ በስብሐተ፡ እግዚአብሔር፣፡ ይትከወስ፡ ማየ፡ ባሕር።
15 እንበይነዝ፡ ስብሐተ፡ እግዚአብሔር፡ ይከውን፡ በደሴያተ፡ ባሕር፣፡ ስመ፡ እግዚአብሔር፡ ይሴባሕ።
16 እግዚአብሔር፡ አምላከ፡ እስራኤል፡ እምአጽናፈ፡ ምድር፣፡ ሰማዕነ፡ መንክረ፡ ተስፋሁ፡ ለጻድቅ።
17 ፍርሃት፡ ወጸድፍ፡ ወመሥገርት፡ ላዕሌሆሙ፡ ለእለ፡ ይነብሩ፡ ውስተ፡ ምድር።
18 ወዘይጐይይ፡ እምፍርሃት፡ ይወድቅ፡ ውስተ፡ ጸድፍ፤ ወዘሂ፡ ወፅአ፡ እምጸድፍ፡ ይእኅዞ፡ መሥገርት።
19 ትደነግፅ፡ ምድር፡ ወትትሀወክ፡ ወተኀሥር፡ ምድር።
20 ወትተነትን፡ ከመ፡ ስኩር፡ ወከመ፡ ኅዳገ፡ ወይን፣፡ ወትጸንን፡ ወታድለቀልቅ፡ ከመ፡ ልገተ፡ ዓቃቤ፡ ቀምሕ፣፡ ወትወድቅ፡ ወኢትክል፡ ተንሥኦ፡ እስመ፡ ከብዳ፡ ኃጢአታ።
21 ይእተ፡ አሚረ፡ ያመጽእ፡ እግዚአብሔር፡ ዲበ፡ ሠርጐ፡ ሰማይ፡ እዴሁ፡ ወላዕለ፡ ነገሥተ፡ ምድር።
22 ወይትጋብኡ፡ ወይትዐጸዉ፡ ወይጸወኑ፡ ወይትአሰሩ፡ ወይሔውጾሙ፡ ለብዙኅ፡ ትውልድ።
23 ወይትመሰዉ፡ ብዝኆሙ፡ ወይወድቅ፡ አረፍቶሙ፤ እስመ፡ ይነግሥ፡ እግዚአብሔር፡ ዘሎቱ፡ ኃይል፡ በጽዮን፡ ወበኢየሩሳሌም፡ ወይሴባሕ፡ በቅድመ፡ ሊቃናት።