1 ወእምዝ፡ ሲሳንስ፡ መልአከ፡ ቄሌ፡ ዘሶርያ፡ ወዘፊንቂስ፡ ወሰተረቡርዛኒስ፡ ወቢጾሙ፡ አኀዙ፡ ይግበሩ፡ በከመ፡ አዘዘ፡ ዳርዮስ፡ ንጉሥ።
2 ወቆሙ፡ ለሊሆሙ፡ አስተሐሚሞሙ፡ ምስለ፡ ረበናተ፡ አይሁድ፡ ወይኤዝዙ።
3 ወተገብረ፡ ፍጡነ፡ መቅደስ፡ ወገብሩ፡ ቅድሳተ፡ እንዘ፡ ይትኔበዩ፡ ሐጌ፡ ወዘካርያስ፡ ነቢያት።
4 ወፈጸሙ፡ ገቢረ፡ በትእዛዘ፡ እግዚአብሔር፡ አምላከ፡ እስራኤል፡ በዘ፡ አእመሩ፡ ቂሮስ፡ ወዳርዮስ፡ ወአርጠርክስርክሴስ፡ ንጉሠ፡ ፋርስ፡ ወኀልቀ፡ አመ፡ ሳድስ፡ ዓመተ፡ መንግሥቱ፡ ለዳርዮስ፡ ንጉሠ፡ ፋርስ።
5 ወተፈጸመ፡ ቤቱ፡ አመ፡ ሰሙኑ፡ ለጽልመት፡ ወርኀ፡ አዳር፡ በሳድስ፡ ዓመተ፡ መንግሥቱ፡ ለዳርዮስ።
6 ወገብሩ፡ ደቂቀ፡ እስራኤል፡ ወካህናትኒ፡ ወሌዋዊያንኒ፡ ወኵሉ፡ ሕዝብ፡ እለ፡ አተዉ፡ እምኀበ፡ ተፄወዉ፡ ዘበሕጉ፡ በከመ፡ ጽሑፍ፡ ውስተ፡ መጽሐፈ፡ ሙሴ።
7 ወገብሩ፡ ለመድቅሐ፡ ቤተ፡ መቅደስ፡ ዘእግዚአብሔር፡ አልህምተ፡ ፻፡ ወአጣሌ፪፻፡ ወአባግዐ፡ ፬፻።
8 ሐራጊተ፡ በእንተ፡ ኵሉ፡ ኀጢአቶሙ፡ ለኵሉ፡ እስራኤል፡ ፲ወ፪፡ በኊልቈ፡ ሕዝብ፡ መሳፍንቲሆሙ፡ ለእስራኤል።
9 ወቆሙ፡ ካህናት፡ ወሌዋዊያንኒ፡ ልቡሳኒሆሙ፡ በበሕዘቢሆሙ፡ ለግብረ፡ እግዚአብሔር፡ አምላከ፡ እስራኤል፡ በከመ፡ ሕጎሙ፡ ዘውስተ፡ መጽሐፈ፡ ሙሴ፡ ወዐጸውትኒ፡ ቆሙ፡ በበአናቅጺሆሙ።
10 ወገብሩ፡ ፋሲካሆሙ፡ ደቂቀ፡ እስራኤል፡ እለ፡ አተዉ፡ እምኀበ፡ ተፄወዉ፡ አመ፡ ዐሥሩ፡ ወረቡዑ፡ ለሠርቀ፡ ቀዳሚ፡ ወርኅ፡ እስመ፡ አንጽሑ፡ ርእሶሙ፡ ካህናት፡ ወሌዋዊያን፡ ኵሎሙ፡ ኅቡረ።
11 ወደቂቆሙሰ፡ ለእለ፡ አተዉ፡ እምኀበ፡ ተፄወዉ፡ ኢያንጽሑ፡ ርእሶሙ፡ እስመ፡ ኵሎሙ፡ ሌዋዊያን፡ ኅቡረ፡ አንጽሑ።
12 ወጠብሑ፡ ፋሲካሆሙ፡ ለኵሎሙ፡ ደቂቀ፡ እለ፡ ተፄወዉ፡ ወለአኀዊሆሙኒ፡ ለካህናት።
13 ወበልዑ፡ ደቂቀ፡ እስራኤል፡ እለ፡ ተፄወዉ፡ ኵሎሙ፡ እለ፡ ተፈልጡ፡ እምርኵሶሙ፡ ለአሕዛበ፡ ምድር፡ ከመ፡ ይኅሥሥዎ፡ ለእግዚአብሔር።
14 ወገብሩ፡ በዓለ፡ ናእት፡ ሰቡዐ፡ መዋዕለ፡ እንዘ፡ ይትፌሥሑ፡ ቅድመ፡ እግዚአብሔር።
15 እስመ፡ ሜጠ፡ ልቦ፡ እግዚአብሔር፡ ለንጉሠ፡ ፋርስ፡ ወአጽንዐ፡ እደዊሆሙ፡ ለግብረ፡ አምላከ፡ እስራኤል።