1 ወከመዝ፡ ይቤሎ፡ ነቢይ፡ ረዓይ፡ ዘይብልዎ፡ ይእዜሰ፡ ተፈሣሕ፡ ኅዳጠ፡ በብርሃነ፡ ሰዓት፡ ወሀለዎ፡ ይትበቀለከ፡ እግዚአብሔር፡ ቅዱስ፡ እስራኤል፡ በዘኢተሐዘብከ፡ ገጽ።
2 ተብለነ፡ ረዋጽያነ፡ አፍራስየ፡ ወበእንተዝ፡ አመሥጥ፡ በበዲር።
3 ወአንሰ፡ እብአከ፡ እምአንስርት፡ ይረውፁ፡ እለ፡ ይዴግኑከ፡ ወኢታመሥጥ፡ እመንሱት፡ ወመዓተ፡ እግዚአብሔር፡ ዘላዕሌከ።
4 ወትብልኑ፡ እለብስ፡ ሐፂነ፡ ወኢይክለኒ፡ ሂጵተ፡ ቀስት፡ ወደርብዮ፡ ኵያንው፡ ወአክኮኪ፡ ከማሁ፡ በደርብዮ፡ ሐፂን፡ ዘኢትቤቀለከ፡ ይቤ፡ እግዚአብሔር፡ ቅዱሰ፡ እስራኤል፡ አላ፡ አመጽእ፡ እኪተ፡ ሕማመ፡ ውስተ፡ ልብከ፡ ዘየአኪ፡ እምሄጳተ፡ ቀስት፡ ወደርብዮ፡ ኵናት፡ ወደዌ፡ ሲሕ፡ ወአበቅ።
5 ወአመጽእ፡ እኪተ፡ ሕማመ፡ ውስተ፡ ልብከ፡ ወተኃጥእ፡ ዘይረድአከ፡ ወኢትረክብ፡ እስመ፡ ወሀከ፡ መዓትየ፡ ወኢታመሥጥ፡ እምእዴየ፡ እስከ፡ አጥፍዕ፡ እምድር፡ ዝክረከ።
6 ወተአምረኒ፡ ከመ፡ አነ፡ እግዚአብሔር፡ ፈጣሪከ፡ ሶበ፡ አገብሮ፡ ለዝንቱ፡ ነገር፡ ፍጡነ፡ ከመ፡ ቅጽበተ፡ ዓይን፡ እስመ፡ አንተ፡ አግዘፍከ፡ ክሣድከ፡ ወአልዓልከ፡ ርእሰከ፡ ዲበ፡ ሀገርየ፡ እስመ፡ አንተ፡ ከመ፡ ሣዕር፡ ዘቅድመ፡ ገጸ፡ ነፋስ፡ ዘይበልዖ፡ እሳት፡ በቅድመ፡ አዕይን፡ ትየ፡ ወከመ፡ ሐመድ፡ ዘይነሥእዎ፡ ነፋሳት፡ ወአውሎ፡ እምቅድመ፡ ገጸ፡ ምድር፡ ከማሁ፡ አንተ፡ በኀቤየ።
7 እስመ፡ ወሀኮ፡ መዓትየ፡ ወኢያእመርከ፡ ፈጣሬ፡ ዚአከ፡ ወአነሂ፡ ኢትኄየዮ፡ ለኵሉ፡ ዘዚአከ፡ ወኢያተርፍ፡ ዘያስተአዝብ፡ በኵሉ፡ አድባሪከ።
8 ወይእዜኒ፡ ነስሕ፡ እምነ፡ ኵሉ፡ እኩይ፡ ዘገበርከ፡ ወለእመ፡ ነሳሕከ፡ ወተጋነይከ፡ በቅድመ፡ እግዚአብሔር፡ በአንብዕ፡ ወበብካይ፡ ወሰአልከ፡ ኀቤሁ፡ በንጹሕ፡ ልብ፡ ይትዓደዋ፡ እግዚአብሔር፡ ለኃጢአትከ፡ በኵሉ፡ ዘአበስከ፡ በቅድሜሁ።
9 ወውእተ፡ ጊዜ፡ በከየ፡ መቃቢስ፡ ቅድመ፡ እግዚአብሔር፡ በእንተ፡ ኃጢአቱ፡ ወለብሰ፡ ሐመደ፡ እስመ፡ ተምዕዖ፡ እግዚአብሔር።
10 ወአእመረ፡ ከመ፡ ኢያጐነዲ፡ እግዚአብሔር፡ እኪተ፡ ዘነበበ፡ በአፈ፡ ነቢዩ፡ እስመ፡ ትጉሕ፡ አዕይንቲሁ፡ ወኢይነውም፡ ወክሡት፡ ዕዘኒሁ፡ ወኢይጸመም፡ ወኢትሔሱ፡ ቃለ፡ ዘነበበ፡ ወይገብራ፡ በአሐቲ፡ ጊዜ፡ ከመ፡ ቅጽበተ፡ ዓይን።
11 ወገደፈ፡ አልባሲሁ፡ ወለብሰ፡ ሠቅ፡ ጸጕር፡ ወወደየ፡ ሐመደ፡ ዲበ፡ ርእሱ፡ ወበከየ፡ ወገዓረ፡ ቅድመ፡ እግዚአብሔር፡ አምላኩ፡ በእንተ፡ ዘገብረ፡ እኩየ።