Hover a verse for quick parallels · click it for the full panel across Bibles & notes.
1 ወበእማንቱ፡ መዋዕል፡ ታገብእ፡ ምድር፡ ማሕፀንታ፡ ወሲኦል፡ ታገብእ፡ ማሕፀንታ፡ ዘተመጠወት፡ ወሀጕል፡ ያገብእ፡ ዘይፈዲ።
2 ወየኀሪ፡ ጻድቃነ፡ ወቅዱሳነ፡ እምኔሆሙ፡ እስመ፡ ቀርበት፡ ዕለት፡ ከመ፡ እሙንቱ፡ ይድኅኑ።
3 ወበእማንቱ፡ መዋዕል፡ ይነብር፡ ኅሩይ፡ ዲበ፡ መንበሩ፡ ወኵሎ፡ ኅሊናተ፡ ጥበብ፡ እምኅሊና፡ አፉሁ፡ ያወፅእ፡ እስመ፡ እግዚአ፡ መናፍስት፡ ወሀቦ፡ ወሰብሖ።
4 ወበእማንቱ፡ መዋዕል፡ ይዘፍኑ፡ አድባር፡ ከመ፡ ሐራጊት፡ ወያንፈርዕፁ፡ ከመ፡ መሐስእ፡ ጽጉባነ፡ ሐሊብ፡ ወይከውኑ፡ ኵሎሙ፡ መላእክት፡ በሰማይ።
5 ወገጾሙ፡ ይበርህ፡ በፍሥሓ፡ እስመ፡ በእማንቱ፡ መዋዕል፡ ኅሩይ፡ ተንሥአ፡ ወምድር፡ ትትፌሣሕ፡ ወጻድቃን፡ ዲቤሃ፡ የኀድሩ፡ ወኅሩያን፡ ውስቴታ፡ የሐውሩ፡ ወያንሶስዉ።